Shillong, Nailar 20
Hadien ka jingshah thombor jong ki kali Sorkar ha ka por ba ka Khasi Students’ Union (KSU) ka pynlong ïa ka jingïaid rally arshaka, ka Meghalaya Government Drivers’ Welfare Association (MGDWA), ka la kyntu ba dei ban kiar ban buh ïa ki kali Sorkar ha ki jaka ba don jingma bad bym shngaiñ.
Ha ka jingai jingmut sha u Chief Secretary ha ka sngi Palei jong ka taïew, u President ka Association, u Bah C.Syiemlieh u la pyni, ba katto-katne ki kali Sorkar ki la shah pynjulor bad don ruh kiba la shah thang ha ka jingïaid paidbah, kaba la pynlong da ka Khasi Students’ Union hynnin ka 19 tarik u Nailar 2026, bad ba ki don ruh ki nongñiah kali, kiba la mynsaw malu mala katba ki dang don ha ka kam.
Da kaba pynpaw ïa ka jingsngewkhia halor ka jingshngaiñ jong ki nongñiah kali Sorkar kiba hap ban pynïaid ïa ki kali Sorkar, ka seng ka la kyrpad ïa ka Sorkar Jylla, ba kan pynmih ïa ki jingbthah kiba donkam sha baroh ki tnad, ban leit jingleit ne ïaid lynti khlem da donkam ïa ki kali Sorkar ha ki jaka ba don jingma.
Ka seng ka la ai jingmut ba hangno-hangno ki jaka ba biang, lah ban ailad ïa ki nongñiah kali Sorkar ban pyndonkam ïa ki kali shimet jong ki ophisar na ka bynta ki kam ophis ba man ka sngi, tad haduh ba ka jinglong jingman kan long ba jai-jai.
Shuh shuh ka seng ka la kdew ruh, ba watla ki trei ha ki jingeh, hynrei ïa ki nongñiah kali Sorkar ym ju ai kano-kano ka Risk Allowance bad kyntu ïa ka Sorkar ba kan pyrkhat ïa ka jingdawa jong ka, kaba la slem bha.
Ka seng ka kyrmen ba yn shim khia mardor na ka bynta ka jingshngaiñ bad jingbha jingmiat jong ki nongñiah kali Sorkar bad na ka bynta ban ïada ïa ki mar ki mata jong ka Sorkar.
