Guwahati, Nailar 20
Hapdeng ka jingjur ka jingkulmar ba mih na ka jingshah thombor ki kali bad ki nongshong kali ka Assam ha ka bike rally ka Khasi Students’ Union (KSU), u Nongtrei bhalang (activist) ka Assam u Srinkhal Chaliha u la maham ba ka lah ban don ka jingpynphai kylliang pyrshah ïa ki nong Meghalaya lada ki kam thombor ki dang ïai bteng.
Kane ka jingmaham kala mih hadien ka jingjia shah pynjulor ki kali bad shah shoh ki briew ha ka surok Guwahati-Shillong, khamtam ha ki thaiñ Khanapara bad kiwei ki jaka rung, ïa kaba la kynnoh donkti da ki nongkyrshan jong ka Khasi Students’ Union (KSU) ha ka por ba ïakhih ha Shillong.
Ki seng jong ki kali kamai na Assam kila pynlong ïa ka jingïakhih bad pakhang ïa ka surok ha baroh ki jaka rung sha Assam kynthup ïa ka Khanapara bad Jorabat, haba dawa ban leh eiei pyrshah ïa kiba donkti ban thombor ïa ki kali na Assam bad dawa ruh ïa ka jingpahara kaba khlain ïa ki kali Assam ba wan rung sha Meghalaya.
Namar kane ka jinglong jingman, u Chaliha u la ong, “Ngin sa thoh ïa ka histori ba thymmai jong ka jingïakhih lada ki kam thombor kim sangeh noh. Lada donkam, ngin beh krad lut ïa baroh ki samla pule ka Meghalaya na Assam”.
Kane ka jingkynthoh jong u kala pynmih ïa ka jingsngewkhia halor ka jinglah ban pur kane ka jingkulmar ha Shillong sha Assam, ka ban ktah ïa ki samla pule, ki nongtrei bad ki nongshong shnong na Meghalaya kiba sah ha Assam.
