Nongpoh, Nailar 20
Ka jinglong jingman na ka jingmih jong ka jingshah thang bad shah pynjulor jong ki kali Sorkar bad kali shimet ha ka sngi ba ka Khasi Students’ Union (KSU) ka la pynlong ïa ka ‘bike rally’ ka la poi sha u pud ba ha ka sngi Palei, baroh ki kali Meghalaya kiba hiar sha Guwahati, Assam ki la shah pynphai noh tang mar ïa poi ha Jorabat ha ki briew na Assam bad la pyllait tang ïa ki kali kit nongpang.
Ha kane ka sngi, la sakhi ruh ba ki dkhot ka Bir Lachit Sena na Assam kila mih ban wan shong kyllain mungor ha Jorabat ha kaba ki la dawa ba dei ban siew bai lutskan sha kito ki kali Assam kiba la shah pynjulor ha ka jingïaid ‘bike rally’ ka KSU ha nongbah Shillong lem bad ïa kito kiba la ngat ha ka jingmynsaw ruh kumjuh.
Kumban shu kdew, ka jingmih ki paid nong Assam ban khang ïa ki kali Meghalaya ban rung sha Assam ka dei hadien ba ki la don katto katne tylli ki kali Assam kiba la shah pynjulor bad shah pynmynsaw ha ka por ba ïaid bike rally ki samla KSU ha nongbah Shillong.
Hashwa jong katei ka jingshah khang ki kali Meghalaya ha Jorabat ban rung sha Assam, la ïoh jingtip ruh ba ki la don katto katne tylli ki kali kamai na Meghalaya kiba la shah pynjulor ha ki nong Assam ha ki bynta jong ka thaiñ Khanapara.
Ki bor pynïaid district ka Ri Bhoi tang mar ïa ïoh jingtip halor katei ka jingshah khang kali, kila hiar mar mar sha Jorabat ha ryngkat ka kynhun pulit ban tem ïa ka jingkynad bad ïaleh ban wanrah ïa ka shongsuk shongsaiñ bad jingshngaiñ jong ki paidbah.
Ha kawei pat ka liang, ban tem ïa ka jingnang klang ka jingkynad, u Dr. Abhishek Saini, DC ka Ri Bhoi u la pynmih hukum ruh ban khang khyrdep ar sngi lynter ïa ki dukan kyiad ha baroh kawei ka district, kata ha ka 20 bad 21 tarik u Nailar, kum shi bynta ban pynneh pynsah ïa ka shongsuk shongsaiñ.
