Shillong, Nailar 20
Ki nongñiah kali kamai Tourist ka Jylla kiba don hapoh ka shatri ka All Khasi Meghalaya Tourist Taxi Association (AKMTTA) ki la pynphai lut ïa ki kali Assam ha jingkieng dam kiba thmu ban wan kiew sha nongbah Shillong.
Kane ka dei shi bynta ban jubab ïa ka jingshah pynsangeh bad shah pynjulor ki katto katne ki kali ba na ka Jylla Meghalaya ha ki briew kiba na ka Jylla Assam ha Jorabat Ri-Bhoi District, hapdeng ka jingap ki dkhot ka AKMTTA, ki la don katto katne ki kali Assam kiba la pyrshang ban phet haba la pynsangeh ïa ki, kaba la pynlong ïa ki dkhot ka AKMTTA ban kthong bad pynphai ïa ki.
Haba kren sha ki nongthoh khubor u Bah Ricaldinus Dohling President AKMTTA u la ong ba kane ka jingïakhih ban pynsangeh ïa ki kali kam dei kaba la sdang na ka Jylla Meghalaya, hynrei u la kynnoh ba ki dei ki Association ba na ka Jylla Assam kiba la sdang ban pynsangeh bad jrongkti ïa ki kali Meghalaya ha Jorabat.
U la ong, “Kumba u Assam u la sdang, ngi ruh ngin sdang noh bad kane ka jingbat ïa ki kali kam dei ka ban shu kut noh tang mynta ka sngi, hynrei ngin dang ïai bteng, lada ka long lei ngi kiba ñiah kali Tourist ngi kwah ban pynkut noh ïa ka jingwan ki kali ba nabar tang ha Border” la ong u Bah Ricaldinus.
Haba jubab ïa ki jingkylli u Bah Ricaldinus u la kubur ba kan don ka jingshah ktah katto katne por haba ïadei ka jingwan ki nongjngoh kai pyrthei ha ka Jylla namar ka jingbymïoh shuh ki kali Assam ban wan ha ka Jylla, hynrei u la pynpaw ba kan ïarap pynban ban pynduna ïa ka jingdheng kali ïa ka nongbah Shillong. “Lada kitei kiba na Assam ki ïai bteng ban khang ïa ki kali ba na ka Jylla, ngim banse ban kyndang ïa ki kali kiba don ha ki jaka jngohkai” u la ong.
U la ïathuh ba katkum ka jingïoh jingtip ka seng ki la don haduh san ne hynriew tylli ki kali ba na Meghalaya kiba la shah pynjulor ha ki Association ba na ka Jylla Assam, kaba u la pynshai ba ka AKMTTA ka khlem pynjulor ne ktah kti eiei ïa ki kali Assam, hynrei ka shu bthah ïa ki kali tang ba kin leit phai.
“Kitei ki sdang ban pynpur ïa ka ding, katba ngi pat ngi ïaleh ban pynïoh ïa ka lynti ka ban pynsuk ïa baroh lang ki nongñiah kali kamai kumjuh ki paidbah jong ka Jylla baroh kawei” u la ong.
