Shillong, Nailar 20
U Symbud Myntri Rangbah ka Jylla uba dei peit ïa ka tnad kam pohïing Bah Prestone Tynsong mynta ka sngi Palei u la ong ba ka jinglong jingman ha Shillong ka la don hapoh ka jingpynïaid beit bad ym donkam ban don ka pakhang shnong miet hadien ka jingkulmar ha ka sngi balang, ha kajuh ka por u la pynpaw ruh ba la pynbeit ïa ka jingthut ka leit ka wan ha ka surokbah Shillong-Guwahati.
Hadien ba u la pynïaid ïa ka jingïalang bishar bniah bad u Chief Secretary, DGP, DC bad SP ka East Khasi Hills, u Bah Prestone u la ong ba ym shym la don kano-kano ka jingjia kaba sngewsih haduh ka janmiet sngi Palei.
“Ngi la ïoh jingtip lyngkot na ka bor synshar district haduh mynta ka janmiet kiei kiei ki ïaid beit. Ngi la bthah ïa ka district ba kan kham trei shitom ha ka por miet ban pynthikna ba ka suk ka saiñ ka don hapoh ka jingpynïaid. Kata ka jinglong jingman kam shym la mih, kumta ngin ym don ïa ka pakhang shnong miet”, u la ong.
Halor ka pakhang surok kaba la jia ha Jorabat bad Khanapara ha shilynter ka surok Shillong-Guwahati National Highway naduh mynstep, u Bah Prestone u la ong ba baroh ar tylli ki Jylla ki la tuklar.
“Ngi la bthah ïa ka bor synshar district Ri-Bhoi, bad u Chief Secretary bad u DGP jong ngi ki la ïakynduh bad ki paralok jong ki ha Assam. Ïa ka jingeh la pynbeit mynta ka janmiet hi. Kumba ngi dang kren, ka ïaid ka ïeng ki kali ka long kaba ïaid beit ïaid ryntih na baroh arliang”, u la ong.
Haba pynpaw ba ka KSU ka la kyntait ïa ka jingtyrwa ka Sorkar ban ïakren shwa ban pynlong ïa ka jingïalang, u Bah Prestone u la ong ba ka bor synshar ka la khot ïa ki lyngba u Deputy Commissioner.
“U Myntri Rangbah ka Jylla u la pyntip lyngba u DC ban khot ïa ka KSU ban ïakren, hynrei ki la kyntait da kaba ong ba ka prokram jong ki ka la dep pynbeit.Ngi la pyrkhat ba ka jingïalang paidbah kan long kaba suk kumba la pynthikna sha ka bor synshar district”, u la ong.
U Bah Prestone u la ong ba ki jingkhang jong ka Sorkar ki plie beit na ka bynta ka jingïakren hynrei ka jingthmu mynta ka long ban pynphai biang ïa ka jingsuk bad ka jinglong jingman, da kaba bynrap ba ka Sorkar ka long kaba skhem bad ka aiñ MMPO ka don ha ka jaka jong ka.
Da kaba kyntait ïa ka jingbymlah jong ki riew wad bniah, u la ong ba la ai jingbit ryngkat bad ki kyndon bad ka KSU ka la pynthikna ïa ka jingïalang kaba suk bad kaba don burom.
“Haba phi peit ïa ka jingïalang paidbah, la don shibun ki khynnah shynrang kiba la deng mask. Kane ka pyni shai ba ka jingthmu jong ki kam dei kaba suk. Ka aiñ kan shim ïa la ka jong ka lynti,” u la ong da kaba pynthikna ba ki briew ki don ha ka jingshngaiñ.
U Bah Prestone u la ong ba ka Sorkar ka pyndonkam da ki drone bad ki dur CCTV ban lap ïa ki nongleh kam sniew.
“Mynta ka Sorkar, ki bor synshar district ki don ha ka kam. Ngan pynthikna ïa phi ba hynnin ka sngi ngi la buh ïa ki drone bad kumjuh ruh ki CCTV bad ka bor synshar district ka don ha ka kam ban lap ïa kito ki riew sniew kiba pynjulor khlem da donkam bad leh ïa ki kam runar. Ka aiñ kan shim ïa la ka jong ka lynti”, u la ong.
“Ngi la ïohi ba ki riew sniew ki thombor ïa ki kali Sorkar bad ïa ki kali Assam kaba long pyrshah ïa ka jingmyntoi ka ri bad ka shongsuk shongsaiñ jong baroh ar tylli ki Jylla,” u la bynrap.
U la pyntip shuh shuh ba ki Myntri Rangbah jong baroh ar tylli ki Jylla ki dang ïakynduh ban pynphai biang ïa ka jinglong jingman.
“Ha kine ki khyndiat sngi baroh arngut ki Myntri Rangbah ka Jylla Meghalaya bad Assam ki dang ïakynduh bad kin sa thaw ïa kano-kano ka jait komiti ba ïatreilang bad baroh arngut ki Myntri Rangbah kin sa pynbna shen ïa ki lad ki lynti ban wanrah biang ïa ka jinglong jingman bad ka jingsuk ha baroh ar tylli ki jylla,” ong u Bah Prestone.
