Shillong, Nailar 20
U MLA ka North Shillong Constituency u Bah Adelbert Nongrum u la pynpaw ka jingpynrem ïa ki pulit ha ka jinghiar khynra ïa ka ophis Khasi Students’ Union (KSU) kaba don ha Jaïaw, Shillong.
Ïa kane u Bah Adelbert u la pynpaw ha ka jingwan khmih jong u ïa ka ophis KSU ha ka miet jong ka 19 tarik Nailar hadien ba ki pulit ki la wan ban khynra bad pynbthei bun tylli ki tear gas.
Haba kren u Bah Adelbert u la ong ba kane ka jingleh ka dei kaba hap ban pynrem ïa ki pulit kiba wan ruh khlem da don ki jingthoh kyrteng (nameplate) ha ryngkat kaba kah dur, u la kynnoh ba kane ka rukom wan ka long kum ki lehnoh ne ki riewkhlaw, ym shuh kum ki pulit kiba peit ïa ka jingshngaiñ jong ki nongshong shnong.
U la ong ba kum u nongshong shnong bad kum u nongmihkhmat ka thaiñ u pynrem ïa kane ka jingjia bad ong ba nangne shakhmat kum ka shnong ka hap ban long kawei ba kum kine ki jingjia kim dei shuh ban dang jia. “Nangne shakhmat haba ki donkam ban rung ha ki shnong ki dong, ki dei ban pyntip ïa ki bor shnong, ym dei ba kin shu ïaidlait ne ïaid laitlan” u la ong.
Kum u MLA u la ban biang ïa ka jingpynrem ïa ka tnad pulit bad ong ba kane ka jingleh jong ki, ka long ka jingleh bymdon jingkitkhlieh namar kidei ki briew kiba dei ban pyntreikam ïa ka aiñ, pynban ki dei kiba pynkheiñ ïa ka aiñ, ki long thik kum ki khawpud.
