Shillong, Nailar 20
U Deputy Commissioner (DC) ka East Khasi Hills Abhilash Baranwal ha ka sngi Palei u la ong ba ki jingkam jong ka KSU ba ki runar ki la shimkabu ïa ka bike rally ban pynjah burom ïa ka seng, kam ïahap satia bad ki sakhi satar bala ïoh lum.
Haba kynthoh ïa ki jingpynksan ka KSU, u DC u la ong, “Kano kano ka jingpyni nia ka dei kaba hap ban bishar pyrshah ïa ka sakhi kiba don bad ngi. Ha kane ka jingjia, la kumno kumno ruh ha kane ka rally, kila don bun ki briew kiba rah ïa ki dieng, ki nar-rod, ki nombor plate bala tap bad ba kah dur khmat”.
U ong ba ka jingïaid ki kam thombor ka kdew pyrshah ïa ki jingkam ba dei ki jingleh jong ki briew ba nabar.
“Nalor kata, kam dei tang kawei ne ar tylli ki jingjia ba jia ha shilynter ka jingïaid rally, kila don bun tylli ki jingjia. Lada phi bishar ïa kine ki jingjia, ngam tharai ba ki jingpynksan nia ki ïahap bad ki sakhi,” u la ong.
U DC u la ong, kane ka kam ka dang don hapdeng ka jingtohkit bad kan shong ha ka ïingbishar ban rai la ka dei ka jingïasylla lane kaba da thmu lypa.
“Ka dei ka kam ba hap tohkit bad khatduh ïa ka ejahar la dep ban ujor. La ka dei kaba thmu lypa ne ba don ki nongsylla, la ka dei ba don kiba kynshoit lane don ki riew bymman kiba pyrshang ban shimkabu ïa ka rally ka dei kaei kaei ka ban sa mih ha ka jingtohkit bad ka kam jong ka ïingbishar ban rai,” u la ong.
U la bynrap “Hynrei, ïa mynta, namar kane ka jingjia ka jia tang hynnin ka sngi, ngi hap ban shong bishar ïa kino kino ki jingpyni nia pyrshah ïa ki sakhi ba don bad ngi bad ki sakhi ki don ïa baroh ban ïohi. Kila mih ha ki social media, ha ki lad pathai khubor baroh”.
“Ka shong ha ka rukom pyrkhat jong baroh la ka dei kaba da thmu lypa ne la ki dei ki dkhot jong ka seng lane don kiwei ki riew bymman kiba kwah ban shim kabu ïa kane ka bike rally,” ong u DC.
