Shillong, Nailar 21
U Sirdar ka Hima Mawsmai Nongthymmai Elaka Bah Kenes Khongwar u la pyntip ba ki don ki nongjngohkai pyrthei kiba la shimwai noh da ki local taxi na Sohra namar kim nud shuh ban wanphai da ki kali Assam naduh ba shah pynjulor ïa ki kali ha ka 19 tarik mynta u bnai ha ka por ba ïaid “rally” ka KSU da ki thuk-thuk ha Shillong.
U Bah Kenes u la ong ba ki don ki kali Assam kiba kit ïa ki nongjngohkai pyrthei kiba dang sahkut ha Sohra haduh mynta hynrei um tip pat katno tylli ki don namar ha Sohra ka jaka ka là heh namar ki bun ki Guest House bad Home Stay.
U la ong ba ki kali Assam kiba sahkut ha Sohra ki bun kiba la set ha ki jaka sah jong ki namar kim nud shuh ban mih naduh ba mih ka jingïahuri hura.
U la ïathuh naduh katei ka sngi 19 tarik Nailar haduh mynta ym don shuh kiba wan jngohkai pyrthei ha Sohra.
U la ai jingmut haba ïakhih dei ban pynurlong ïa ki san tylli ki mat ym dei pat ban kyrdem ïa ki kali kiba wan jngohkai ne shoh ïa ki riew paidbah nanar ka ktah ïa ka shongsuk.
