Shillong, Nailar 21
Ka Nongbah Shillong ka la sakhi ïa ka jingshah kawang petrol bomb ha ki runar bym lah ban ithuh, la ka long ha ki Police Station bad ha ki ophis Sorkar ha kylleng ki jaka, bad ym tang ha Shillong hynrei la sakhi ba ha kylleng ki district ruh kumjuh.
Ym tang ka jingshah kawang petrol bom hynrei la ïohi ruh ba ki runar ki la thang ruh ïa ki kali, kiba dei ki kali Sorkar. Ïa kane ngi lah ban sakhi shuh-shuh ba ha ka step phyrngap jong ka sngi Thohdieng jong ka taïew, ki runar bym lah ban ithuh durkhmat, ki la leit ban kawang petrol bomb ïa ka ophis jong ka National People’s Party (NPP), kaba don ha Lachaumiere, Shillong.
Katkum ki khubor ba la ïoh lum la ïathuh, ba kane ka la jia ha ka por 5 baje ei-ei mynstep, ha kaba ki la don ar ngut ki runar kiba la kawang petrol bomb ha katei ka ophis. La ïathuh ruh ba kine ki runar ki la wan da ka scooty bad mar shu poi ha katei ka jaka ki la hiar bad kawang petrol bomb.
Ha kane ka jingjia ki pulit ki don ban pahara ha ophis NPP hynrei ym shym la don kano-kano ka jingmynsaw, bad kam don ka jingjulor namar ba u petrol bomb u leit poi tang ha ka phyllaw katei ka ophis.
Kumta na ka liang ki pulit ki la khang khyrdep noh ïa ka ophis ka party, khnang ban lait na kino-kino ki jingjia.
