Mawkyrwat, Nailar 21
Ka Khasi Student’s Union (KSU) South West Khasi Hills District ha ka 21 tarik u Nailar, 2026 ka la leit ban ïakynduh ïa ki ar ngut ki MLA, kata, u MLA ka Mawkyrwat, Bah Renikton Lyngdoh Tongkhar bad u MLA ka Mawsynram, u Bah Olansing Suiñ ban pynbor ïa ki ba ki dei ban kren eiei khamtam ba ki ïatreilang bad ka Sorkar MDA ban pynurlong ïa ki 5 tylli ki mat ba ka seng ka la buh bad dawa ban pyntreikam.
Ïa ka kynhun ba leit ïakynduh ïa u Bah Renikton Lyngdoh la ïalam da u samla Plosbor Kharjahrin , Environment & Cultural Secretary, KSU-SWKHD ha ryngkat ka jingsynranlang u samla Rutherford Lyngdoh, General Secretary ka KSU Mawkyrwat Circle bad kiwei de ki nongïalam bad ïa ka kynhun ba ïakynduh ïa u Bah Olansing la ïalam da u samla Jiedskhem Nongsiej, General Secretary KSU-SWKHD.
Ka KSU South West Khasi Hills District haba kren sha ki lad pathai khubor, ka kren shai ba watla ka don ka jingshah kem jong ki nongïalam ba hakhmat jong ka Central Executive Council hynrei ki Unit bad ki Circle napoh ka South West Khasi Hills District kin ïai buddien ïa ki nongrim jingdawa jong ka seng haduh ban da urlong hapoh ka jingïalam jong ka KSU-CEC.
