Shillong, Nailar 21
U nongïalam ka Liang Pyrshah u Dr. Mukul Sangma mynta ka sngi Thohdieng u la kynthoh ba ka Sorkar Jylla ka la thok halor ka jingpynslem ban pyntreikam ïa ka Meghalaya Residents Safety and Security Act (MRSSA), 2016 bad ka la pynsniew ïa ka bor jong ka.
Haba batai ïa ka aiñ tynrai, u la ong ba ïa ka MRSSA la thaw kum ka sienjam ba shipor katba dang ap ïa ka rai jong ka Sorkar India ban pyntreikam ïa ka Inner Line Permit (ILP) katkum ka Eastern Bengal Frontier Regulation, 1873.
“Ki la don katto katne ki prokram pynkhihwin shwa ban pynjari ïa ka MRSSA 2016 kiba dawa ban pyntreikam ïa ka ILP. Ngim shym la kwah ban lehraiñ ïa ka jingkitkhlieh jong ngi bad ngim shym la kwah ban thok ïa ki paidbah haba ngi don ha ka khlieh jong ka synshar khadar,” u la ong.
U Mukul u la ong ba ka Sorkar jong u ka la pynlong ïa ki jingïamir jingmut kiba bniah bad baroh ki nongshim bynta, kynthup ïa ki seng bhalang kiba ïalam ïa ka jingïakhih ILP bad ka la ïatreilang bad ka Sorkar India.
“Nga la tip ba ka Sorkar India kan sngew artatien ban pyntreikam ïa ka ILP ha ka por jong ngi, te balei ngan thok ïa ki paidbah. Ngi la ong ba ngin don ei ei hapoh ka bor thaw aiñ jong ngi. Kum ki nongthaw aiñ, hapoh ka bor thaw aiñ kaba rit kaba don bad ka ïing dorbar thaw aiñ jong ka Jylla, ngi la thaw ïa kane ka aiñ,” u la ong.
U la pynskhem ba kane ka aiñ ka lah ban ïakhun ïa ki jingeh halor ka jingwan rung ki briew khlem da tehlakam.
“Haduh katta katta, ka lah ban ïakhun ïa ka jingsngewkhia jong ki briew jong ngi katba kum ka jingwan tuid ki briew khlem da tehlakam. Dei na kata ka daw ba baroh ki la mynjur ban khot noh ïa ki jingïakhih kiba ïadei bad ka ILP bad ban ïatreilang ban pyntreikam ïa kane ka aiñ,” u la bynrap.
U Mukul u la pynkynmaw ba ki sengbhalang ki la don bynta ha kaba wad ïa ki jaka rung jaka mih bad ki jaka na ka bynta ki jaka pynsuk, kiba dei ki bynta ba kongsan jong ka aiñ.
“Hynrei mynta ka sngi, kane ka Sorkar ka la pynsniew ïa ka jingpyndonkam baroh kawei ïa ka jingbthah jong ka aiñ, da kaba pyndem ïa ki paidbah. Dei na kata ka daw ba ka don ka jingbym shaniah kaba ïadei bad ka jingthmu jong ka Sorkar,” u la kynnoh.
U la ong kane ka aiñ ka la ai bor beit-beit ïa ki Rangbah Shnong, ki khlieh nongsynshar bad ki jaka treikam tynrai kiba lym kumta kim shym la don hangta. Ka rukom treikam ka long ba ryngkat bad ki tnad Sorkar kum ki pulit, ki jaka treikam tynrai ki don ka bynta kaba mar katjuh khnang ba kan ym don ka jaka ban pyndonkam bakla ban pynlah ïa uno-uno u briew ban wan rungtuh.
Halor ka jingpyntreikam, u Mukul u la ong ba kumba 39 tylli ki post jong ki Labour Inspector la mynjur bad la pyntip sha ki District Task Force ba la khlieh da ki Deputy Commissioner.
“Shi bynta ka treikam hynrei kam pat treikam pura, bad ka long kumba ka long haduh mynta,” u la ong.
Haba kynthoh ïa ka jingïeng jong ka Sorkar halor ka Umling Facilitation Centre, u Mukul u la ong ba ka Sorkar ka ïalam bakla ïa ki briew da kaba pynjah burom ïa ka hukum jong ka High Court.
“Ka bynta treikam ka long ba haba ym don ki kyndon kiba biang, ym dei ban pyntreikam ïa ka Facilitation Centre. Ka kam jongno ban wanrah ïa ki kyndon kiba biang? Kam dei ka kam jong ka KSU ne ki rangbah shnong, ka dei ka kam jong ka Sorkar,” Balei kim wanrah ïa ki kyndon ban pyntreikam? u la kynnoh.
U Mukul u la ong ba la wanrah ïa ka Resolution ha u snem ba la dep bad ka Sorkar ka la pynthikna ïa ka ïingdorbar ba kan pyntreikam ïa ka aiñ.
“Ka aiñ ka don ki bniat kiba biang ban sumar ïa ki jingeh bapher bapher jong ki paidbah. Kane ka aiñ kam shym la long ka tnat jong uwei u briew uba trei kum u nongthoh marwei. Ngi la pynrung ïa uwei pa uwei u nongshim bynta katba ngi dang shna ïa ka aiñ ba la tyrwa bad man la ki seng saiñpyrthei ha ka ïingdorbar ki la jied ïa ka Bill ban long aiñ,” u la bynrap.
