Shillong, Nailar 21
Ki pulit ki la pynkynriah ïa ki lai ngut ki nongïalam ka Khasi Students’ Union (KSU), kiba shah kem na Shillong sha ki phatok bapher-bapher ha Ri-lum Garo ha ka step sngi Thohdieng, hapdeng ka jingpahara kaba khlaiñ.
Katkum ka khubor ba la ïoh lum, ïa u President ka KSU, u Samla Raymond Kharjana yn pynkynriah sha William-nagar District Jail, katba ïa u Vice President, Samla Pynkmenlang Sanmiet bad u General Secretary, Samla Reuben Najiar, yn pynkynriah sha Tura District Jail.
Ïa kine ki lai ngut ki nongïalam ka KSU, la rah tian bishar hakhmat ka Ïingkashari District & Session Judge ha ka sngi Palei ha Shillong, hadien ka jingshahkem ba ïadei bad ki kam thombor kiba mih ha ka rally thuk thuk ka KSU.
Ka Ïingkashari ka la hukum ban set 14 sngi ïa ki hapoh ka Judicial Custody.
Kine ki nongïalam ka KSU, ki la shahkem ha ka sngi Balang hadien ka jingpynkulmar bad jingthombor ha ka jingïaid rally thuk thuk, kaba lam sha ka jingjulor haduh 31 tylli ki kali, pynmynsaw haduh bun ngut ki briew, thang ïa ar tylli ki kali nalor ka jingpynpra ïa u mot u Subhas Chandra Bose bad Swami Vivekananda. Ki pulit ki la pyntip ba ki la ïoh pdiang haduh 15 tylli ki ejahar halor kine ki jingjia thombor bad ki la pynngat ïa kine ki nongïalam KSU ha ki kyndon bapher-bapher jong ka Bharatiya Nyaya Sanhita, 2023.
