Shillong, Nailar 21
Ka Hynñiewtrep Achik National Movement (HANM) ka pynpaw ka jingpynrem jur ïa ka jingleh ki briew bym lah ban ithuh, kiba shim kabu ban pynkulmar ha ka jingïaid rally rah lama ïong ka Khasi Students’ union (KSU) kaba la long ha nongbah Shillong ha ka 19 tarik u Nailar 2026.
“Ngi pynrem ïa ka jingpynjulor ïa ka ophis jong ka KSU, khamtam ba ka ophis ka don ha ka jaka ba shong briew, kaba la wanrah ïa ka jingkulmar bad jingsheptieng ïa ki nongshong shnong” la ong ka kyrwoh khubor u Bah Lamphrang Kharbani uba long u President HANM.
Ha ka Ri synshar paidbah, ki samla pule ki don ïa ka hok ban pynpaw ïa ki jingsngewkhia bad ki jingeh jong ki. Ka jingshah kem ki nongïalam kan ym lah ban pynbeit ïa kane ka jingeh, hynrei ka lah ban pynmih shuh-shuh ïa ka jingsngewbitar bad jingïakhih.
Shuh-shuh ka kyrwoh ka ong, ka KSU ka la pynsngew bad ïakhun ïa ki jingdawa kiba hok, ka jingbym shimkhia ka Sorkar ban jubab bad pynbeit ïa kine ki mat, “Ngi ïeng skhem ban kyrshan ïa ki san tylli ki jingdawa kiba la buh da ka KSU, kiba kynthup ïa ka jingpyrshah ïa ka Shree Cement projek, ban pynduh noh ïa ka Public Hearing kaba la long ha ka 31 tarik Naitung, ban pynshitom ïa u Deputy Commissioner, u Superintendent of Police ka East Jaiñtia Hill District kumjuh ïa ki ophisar ka Meghalaya State Pollution Control Board.
Ha ka kyrwoh khubor la bynrap ruh ba ka HANM ka dawa ïa ka jingpyntreikam ba mardor ïa ka Meghalaya Residents Safety and Security Act 2016, ka jingpynbha ïa ka rukom thungkam ha ki tnat Sorkar, ba kynthup ïa ka jingweng noh ïa ka Personal Interview na bynta ki kam Grade C bad Grade D, ka jingbuh kyrpang ïa ki kam Sorkar na bynta ki nongshong shnong ka Meghalaya, ka jingpynbeit ïa ki jingeh kiba ïadei ha ka jingthungkam ha NEIGRIHMS, ka jingpyntreikam ïa ka Inner Line Permit bad ban bud ryntih ïa ki jingkular ka Sorkar ban ym khlong ïa u Uranium.
