Shillong, Nailar 21
Ka Khasi Students’ Union da kawei ka jingmut ka la rai ban pynlong ïa ka jingshong kyllaiñ myngor ha ka 24 tarik mynta u bnai hakhmat u motdur ba shi rynïeng jong u Kiang Nangbah mar pyrshah bad ka Shillong Civil Hospital naduh ka por 11 baje mynstep bad ha ka sngi ba bud pat kata ka 25 tarik Nailar yn pynlong ïa ka jingshong kyllaiñ myngor sa ha ki 7 tylli ki District jong ka Bri u Hynñiewtrep.
Kane ka jingleit shong kyllaiñ myngor ha ka 24 tarik mynta u bnai ka dei ruh ka sngi sdang ka dorbar synrai ki MLA ha ïingdorbar thawaiñ.
Ka Khasi Students’ Union (KSU) mynta ka sngi ka la aiti da ka dorkhas sha baroh ki 36 ngut ki nongmihkhmat paidbah (MLA) ka Bri u Hynñiewtrep kum shibynta ban pynbor ïa kine ki nongmihkhmat ban kren bad pynsngew ïa ki 5 tylli ki mat jingdawa kiba ka KSU ka la buh hakhmat ka Sorkar Jylla khamtam ba ka Dorbar Synrai jong ka Meghalaya Legislative Assembly kan sdang naduh ka 24 tarik mynta u bnai.
Nalor ki 36 ngut ki MLA na Ri Lum Khasi yn pyrshang pynpoi ruh sha ki 24 ngut ki MLA ka Ri Lum Garo.
Kane ka jingleit aiti ïa kine ki Dorkhas sha kitei ki nongmihkhmat la ïa shim bynta da ki dkhot na ki Unit bad Circle kiba hap ha ki Konstitwensi kaba ki MLA ki mihkhmat.
Ïa ki MLA la jied da ki paidbah bad ka dei ka kamram jong ki ban kren ïa ki mat ki jura kiba ktah ïa ka lad ïohkam ïohjam bad ïa ki jingeh jong ka Jaidbynriew ruh baroh kawei. Kumta ka seng ka ieh ha ka jingstad jong ki Nongmihkhmat ïa ka kamram kaba ki dei ban leh.
Ka Seng kan ym shongkli kti ban ïakhih ïa kitei ki mat jingdawa katba ka Sorkar Jylla kam pat lah ban pyntreikam pura ïa ki jingangnud kiba ka seng ka la buh hakhmat ka Sorkar.
Ha kaba ïadei bad lashai ka sngi ka 22 tarik Nailar ka seng kan ym buh ïa kino-kino ki prokram jingïakhih khnang ba kan ym pynwit ïa ki samla ki ban ïakhun ïa ka eksam LDA ba la pynïaid da ka MPSC.
Kane ka long katkum ka kyrwoh ba la pyllait da u samla Pynshai Rani, Assistant General Secretary KSU Sengkmie.
