Shillong, Nailar 21
Ka All Khasi Meghalaya Tourist Taxi Association (AKMTTA) ha ka sngi Thohdieng ka la pynpaw ba ka la rai ban skhem ha ka nongrim ban khang ïa ka jingwan rung ki kali Tourist ba na Assam hapoh ka Jylla Meghalaya.
Haba ïoh ban ïakren ïa u President ka AKMTTA u Bah Rical-dinus Dohling u la ong ba lada ka kam ka dawa ïa ki nongñiah kali kamai ba na ka Jylla, ki hap ban sangeh kamai da bun bnai ruh bad kin mad ïa ki jingjynjar ban khang ïa ka jingwan ki kali kamai ba na Assam.
“Ngin ym shah shuh tdot ban wan kamai ki kali Assam hapoh ka Jylla, na ka liang jong ngi, ngin ym shah, ngin ïa kut beit noh ka jingkamai tang ha ka Jylla lajong, namar ki dei kiba na Assam kiba sdang ban pynkulmar ïa ki paradoh para snam jong ngi” u la ong.
Shuh-shuh u la ban jur ba na ka liang ki nongñiah kali kamai ba na ka Jylla kin ym treh shuh ban kamai shaduh sha Assam, hynrei kin pynkut beit tang ha la ka jong ka Jylla, khnang ba kum kine ki huri hura nangne shakhmat kin ym jia shuh, “Kumba kiba na Assam ki pynkut ïa ngi tang ha Jorabat, ma ki ruh kim bit shuh ban wan sha Shillong ngi la hun” u la ong.
Haba ïadei ba don katto katne ki nongñiah kali ba na ka Jylla kiba kamai sahuh ha kum kane ka por, u Bah Ricaldinus u la kyrpad ba kin ai ka jingïatreilang bad ka Association, kaba u la pynpaw ba ki la don ruh katto katne kiba la shah pynsangeh bad khot ban ai ka jingïatreilang.
Haba jubab ïa ki jingkylli, u Bah Ricaldinus u la pynpaw ba kat haduh mynta kam pat don kano-kano ka jingïakren hapdeng ki Association ba na ka Jylla bad kiba na Assam, hynrei u la phah ka khubor sha ka Sorkar ba lada ka khot ha ka miej jingïakren ruh, ka AKMTTA kan skhem beit ha ka nongrim ban pynkut noh ïa ka jingkamai tang hapoh ka Jylla lajong bad kiba na Assam ruh kim bit shuh ban wan kamai sha Shillong.
