Nongstoiñ, Nailar 21
Ha ka miet jong ka 20 tarik u bnai Nailar, artylli ki kali Sorkar hapoh Nongstoiñ WKHD, ki la ingkhong khait hadien ba la suba ba ki la shah thang ha ki runar ki bym pat lah satia ban tip ki dei kiei.
Ka tyllong khubor ba la ïoh lum ka la ong ba kitei ki artylli ki kali Sorkar kiba la ingkhong ki kynthup ïa kawei ka Mahindra Maxx kaba don ïa u nombor ML-01-4130 kaba dang pynïeng hapoh ka phyllaw jong ka Nongstoiñ C&RD Block katba kawei pat ka dei ka Gypsy kaba dang ïeng ha phyllaw jong u Sibsingh Syiem Inspection Bungalow PWD (Road).
Shuh shuh ka tyllong khubor ba la ïoh lum la ong ba ha kane kajuh ka miet ha ka por 11.30 eiei, ka ophis Superintending Engineer PWD (Roads) Western Circle Nongstoiñ ruh ka la shah kawang ‘Petrol Bomb’, hynrei la ong ba ym shym la don kano-kano ka jingjulor.
