Shillong, Nailar 21
Ka Khyndailad kaba dei kawei ka ïew kaba heh ha Nongbah Shillong, kaba ju khapngiah na ka por sha ka por da ki paidbah ba leit ba wan, hynrei ha ka sngi Thohdieng jong ka taïew pat, la sakhi ba ka la kynjah jar jar bad duna ki briew kiba wan ban ïaid bad ban thied jingthied.
La ïohi ruh ba ki dukan jong ki bar jylla ha shilynter katei ka lynti ïaid kjat, ki la bun ba la khangdam namar ba ka dangdon ka jinghuri hura ha Shillong, kaba la sdang naduh ka por ba pynlong ïaid rally ka Khasi Students’ Union (KSU), kaba la wanrah ïa ka jingshah pynpait pynpra ki kali Assam bad ki kali Sorkar, da ki briew kiba shim kabu.
Kiba bun ki kali Sorkar kiba la shah thang dusmon ha ki runar ban pynpaw ka jingbitar halor ka jingbym leh eiei ka Sorkar ïa ki mat ba ka KSU ka la dawa la slem.
Halor kane ka jingpynpait pynpra ïa ki kali, la sakhi ba ki nongñiah ïa kitei ki kali ki la don bun kiba la mynsaw na katei ka jingjia.
Ki bor pulit ka Nongbah Shillong, ki la syrtap khraiñ ha shilynter ka Khyndailad bad ha kiwei-kiwei de ki jaka, ban pahara bha khnang ba nym don kano-kano ka jingjia kulmar biang ha Shillong.
Kane ka jingpahara bha ki bor pulit ha Khyndailad kadei halor ka jingthmu ka KSU, ban pynlong ka jingshongkyllaiñ mungor ha Khyndailad ban pynsngew ïa ki mat jingdawa jong ka seng sha ka Sorkar Jylla bad kiwei-kiwei de ki mat, hynrei ki dkhot ka KSU kim shym la wan satia.
La sakhi ruh ba ki Pulit, ki la talasi ïa baroh ki arshaka kiba ïaid na Lad Umsohsun, kiba kiew sha Khyndailad.
Shuh shuh la ïohi ruh, ba ka surok ka la kynjah bha bad kylluid war ha shilynter ka surok ha Khyndailad.
