Shillong, Nailar 21
Ka jingsaphriang ki khubor hamsaïa halor ka jingsangeh noh ki kali kit umphniang (Petrol & Diesel) na Assam ban wan sha Meghalaya ka la pynlong ïa ki paidbah ka nongbah Shillong ban ap laiñ ha ki jaka theh umphniang bapher-bapher ha kylleng ka nongbah ha ka miet sngi Thohdieng.
La ong ba bun ki nongñiah kali ki la mareh sha ki jaka theh umphniang ban theh umphniang ha ki kali jong ki.
La ïohi ïa ki laiñ kiba jrong jong ki kali ar shaka bad saw shaka ha ki katto katne ki jaka theh umphniang, ha kaba ki nongshong shnong ki pynpaw ïa ka jingsngewkhia halor ka jinglah ban don ka jingkyrduh umphniang ha ka Jylla.
Haba kren sha ki nongthoh khubor, u Jaddish Singh uba dei u Second Manager jong ka Indian Oil Peak Service, Dhankheti u la ong ba ka umphniang kali (Petrol & Diesel) ki dang biang ha katei ka jaka theh umphniang, hynrei u la pynpaw ba ka ‘stock’ ka lah ban lut noh lada ym don shuh ki kali kit umphniang ba wan poi haduh ka sngi Saitjaiñ.
U la ong ba ka jinglong jingman ka lah ban buh jingeh namar ba ki kali kit umphniang kim lah ban theh umphniang na ka jaka buh umphniang. Lada ym don ka kali kit umphniang kaba poi sha ka jaka theh umphniang, ka ‘stock’ kaba la don lypa ka lah ban lut noh tang hadien katto katne sngi.
Haba ïakren ïa ki katto katne ki nongñiah kali ki la ïathuh ba ki la ïohi ha ki rynsan Social Media ba ki kali kit umphniang kiba dei ban wan sha Meghalaya ki la shah pynsangeh noh ban rung sha Jylla.
Kine ki khubor ki la pynsngewkhia ïa ki nongshong shnong khamtam kiba pyndonkam ïa ki kali ban kamai ha ka jingim ba man la ka sngi. Bun ki la ïa beh mar-mar sha ki jaka theh umphniang ban pyndap umphniang lypa ïa ki kali jong ki, ban kiar na ki jingthut ha ka leit ka wan bad ki kam ki jam jong ki kiba man ka sngi lada jia ba thut ka jingpynpoi umphniang hapoh ka Jylla
