Shillong, Nailar 23
Ka Sohra kaba dei kawei ka jaka jngohkai pyrthei kaba baroh ki briew na kylleng ki ri ka pyrthei ki wankai ka la long kaba kynjah ha kine ki ar sngi naduh ba la shah pynjulor ki kali Assam ha ka 19 tarik mynta u bnai ha ki riew shimkabu ha ka por ba ïaid paidbah ka Khasi Students’ Union (KSU) da ki thuk thuk.
Haba wad bniah ïa ka jinglong jingman ha ka thaiñ Sohra, U Nongsaiñ Hima u la hiar sha Dympep kaba dei ka jaka rung kaba nyngkong eh ba ki nongshangkai pyrthei ban hiar ban leit peit ïa ki lum ki wah hashwa ba kin leit sha ki jaka jngohkai ha Sohra, mynta ha kine ki ar sngi ka long kaba kynjah bha namar ba ki nongwan shangkai pyrthei na kiwei ki Jylla ki duna bha.
Haba ïoh ban ïakren bad uwei u rangbah ba shim bai ïeng kali ha Dympep u la ïathuh ba ka jingkynjah mynta ha kine ki arsngi ka dei namar ba kim don ki kali kiba nabar Jylla kiba wan khamtam ki kali Assam bad ki don tang ki kali napoh ka Jylla.
U la ïathuh ba mynta ki don tang 30 tylli ki kali kiba wan ha kine ki 2 sngi hynrei baroh shi katta ki poi beit ki kali kiba nabar 100 tylli lane tam.
Ki nongshongdie dukan pat ki ïathuh ba ha kine ki arsngi naduh ba don ka jingïakhih kim lah ban die ïa ki jingdie bad lada ka dang long kumne ki shem jynjar namar ba ki nongjngoh kai kim don ba wan namar kiba bun kiba thied ïa ki jingbam ki dei beit ki nongshangkai pyrthei.
Haba pyrshang ban ïakren bad ki nongdie soh harud surok ha shilynter ka surok bah ha Upper Shillong ki la ïathuh ba ha kine ki ar sngi kim lah ban die ïa ki soh namar ba ki nongwan shangkai na ki wei ki Jylla kim don namar ym shym la wan shuh ki kali na Assam.
Ki la ïathuh myn ha ka 21 tarik Nailar 2026 ka long kaba kynjah bha haba nujor bad ka 22 tarik kaba dei ka sngi Saitjaiñ.
Ki la ong ba lada ka long kumne ka buh jingeh ïa ki namar ba ki hap ban die ïa ki mar pyut bad lada ym don ba thied ki hap ban shu bret.
Kane ka jingduna ki nongjngohkai pyrthei ka dei namar kiba bun ki wan da ka kali Assam ki la sangeh naduh ba shah pynjulor ha ka jingïaid rally ka KSU ha ka 19 tarik mynta u bnai.
