Shillong, Nailar 23
U Deputy Commissioner ka East Khasi Hills District, u Abhilash Baranwal u la leit ban jngoh hi dalade ïa ka bynta jong ka Wah Umkaliar hadien ba u la sngap ïa ki jingsngewkhia namar ka jingkiew ka jingjaboh jingjakhlia ha kane ka Wah kaba tuid sha Wah Umkhrah.
Ha kane ka jingjurip la ïadonlang ki bor pynïaid shnong na ki shnong kiba don shaneng jong kane wah, na Nongmensong, Urkaliar, ki dkhot ka Operation Clean-Up ba lamkhmat da ka Kong Patricia Mukhim, ka kynhun kaba la pyrshang mynta la bun snem ban wanrah ki sienjam ban pynkhie im bad pynbha ïa katei ka Wah, ki ophisar na ka tnad Excise, Shillong Municipal Board, Meghalaya State Pollution Control Board lem kiwei-kiwei pat.
U Deputy Commissioner ha ka jingïamir jingmut da ka jingthmu ban tehlakam ïa ka jingwan tuid ki jaboh jabaiñ, u la pynpaw ba un sa khot da ka jingïalang ïa baroh bad un pynkhreh da ka Standard Operating Procedure (SOP) ban don da ki kyndon jingpynshitom ïa kiba pynjakhlia ïa ka wah.
U la pan ka jingïatreilang na baroh ki nongïalam shnong, ki tnad Sorkar bad Operation Clean-Up, u la pyntip ruh ban yn don ka jingjurip bniah ïa ki shnat wah ha ki shnong bapher-bapher kiba wan tuid sha kane ka wah khnang ban lah ban khang ïa ki jingpynjakhlia naduh tynrai.
Hadien kane, u Deputy Commissioner na ka jingpyntip ki rangbah, u la leit jngoh ïa ka bynta jong ka Wah kaba hap pat sha Urkaliar namar ka jingdon ki longïing kiba pyntuid ïa ki jakhlia na ki jaka shet ne jaka leit bar beit-beit sha ka Wah.
Ha kaba ïadei ba mih ki jingkynthoh ba ki jaboh jabaiñ ki mih na ka jingbym shimkhia ka Dorbar Shnong Nongmensong, ki nongshong shnong, ki nongïalam shnong bad khun samla, ki la pynpaw ba ki ruh ki sngewkhia na bynta ka jingwan tuid jakhlia sha katei ka wah.
Ki la ong ba ki jakhlia kim mih tang na ka shnong jong ki, da kaba kdew ba katei ka Wah ka dei u pud u sam bad kiwei pat ki shnong, kumta ki pynpaw ka jingbymsngew ïahap haba ïadei ki jingshah kynnoh ba pyrshah ïa ka shnong.
Haba bynrap, ki la pynpaw ka jingsngew burom ïa ka Kong Patricia Mukhim kaba la pynpaw ka jingsngewkhia ba donkam ban tehlakam ïa ki jaboh jabaiñ ha katei ka wah bad ong ba ki ruh ki sngewkhia kumjuh bad angnud ba kan long kum ha ki por ba la mynshuwa.
