Ha kine ki khyndiat sngi, ngi la sakhi ba na ka jingïakhih kaba la pynlong da ki nongpynïaid kali na Assam, kata ban khang noh ïa ki kali Meghalaya ban rung sha Assam ha Jorabat, kata kaba la pynlong hadien ka jingpaw jong ki kam thombor pyrshah ïa ki kali ba don registration number jong ka Assam ha nongbah Shillong ha ka bike rally ba la pynlong da ka KSU ha ka 19 tarik mynta u bnai, ka la wanrah shisha ïa ka jingkylluid hi war jong ki surokbah, ki surok ha nongbah Shillong bad ki surok ha kylleng ki bynta kiba lam sha ki jaka jngohkai. Ha kane ka jingïakhih, wat na ka liang jong ki nongpynïaid kali na Meghalaya ruh ki la shim lang kajuh ka sienjam ban khang noh ïa ki kali Assam ban rung sha Meghalaya.
Ha kane ka jingïakhih kaba la neh kumba 3 sngi eiei, ka nongbah Shillong bad kiwei pat ki bynta jong ki surok ha Jylla ki la thylli war war bad kane hi ka pyni, ba ka jingbun jong ki kali na Assam kiba rung sha ka jylla ka la long shisha kaba palat liam ha ka shisngi shisngi. Ha kane ka jingïakhih, kaba la ktah ïa ki nongleit nongwan, ka la mih ruh ka sur na ki nongpynïaid kali tourist ka Meghalaya, ba la dei ban pynïaid noh ha kane ka rukom ïa ki kali kamai tourist, ba kiba na Meghalaya kin kit briew tang haduh Jorabat bad kiba na Assam ruh kin kit tang ha Jorabat. Kane ka long shisha ka mat kaba biang eh namar ym tang ba kan wanrah ïa ka jingkylluid ïa ka Meghalaya na ka jingshlei jong ki kali kamai na Assam hynrei kan plie ruh ïa ka lad ban kyntiew pat ïa ka ïoh ka kot jong ki nongñiah kali kamai ka Jylla. Hynrei shwa ban shim ïa kano kano ka rai, kaba donkam ka long ban da ïathir bad ïatai sani bha khnang ba kiei kiei baroh kin long kiba bit ba biang na ka bynta ki por ki ban wan.
Ngi lah ban sakhi ha Jylla Sikkim, ki kali tourist na kiwei pat ki Jylla kim lah satia ban kit briew bad ïaid katba mon hynrei la buh ïa ki jaka ba kin kyntiew bad pynhiar ïa ki nongshong kali ne ki nongleit kai sha Sikkim. Ban ïalam pat sha ki jaka jngohkai pyrthei kiba pher bapher ha kylleng ki bynta jong ka Sikkim, la leh bad pynïaid shakhmat da ki nongpynïaid kali tourist jong ka Sikkim. Kane ka long shisha kaba biang bha namar lada la ïalam sha ki jaka jngohkai da ki kali trai shnong, yn lah pat ban tehlakam ïa kiba bun ki bynta, kawei ban don ka jingshngaiñ, ban lait na ka jingleh pathar ha ki surok syngkien, kum ka jingbret pathar ïa ki jaboh jabaiñ, ka jingleit shabar pathar bad kiwei kiwei. Ngi ïohi ba ha Sikkim, ki nongñiah kali tourist haba ki kit ïa ki briew ban ïalam sha ki jaka jngohkai bapher bapher, ki ju hikai lypa ba ym dei ban bret pathar ïa ki jaboh ne bret ïa ki kynja paket chip ne ki plastik ne bilor um napoh kali sha surok hynrei kine ki kali ki la pynkhreh lypa da ki pla ba la wah hadien ka jaka shong u nongñiah kali ba ki nongshong kali kin ïoh ban bret. Nalor kane, na ka liang jong ki nongñiah kali tourist ha Sikkim, ki ju pyrkhing bha ruh ïa ki briew ban leit shabar klumar watla dei ha ki surok khlaw ruh.
Kumta ka jingmut bad ka jingpynpaw ïa ka jingkwah ban don noh ka jingkamai jong ki kali tourist na Assam bad Meghalaya ban kit bad pynhiar briew haduh Jorabat ka long shisha ka lynti kaba biang bha, lada lah ban pynlong kam lei, kan long shisha ka jingmyntoi kaba khraw tam.
