Jowai, Nailar 23
Ka Kiang Nangbah Government College, Jowai ha ka 21 tarik Nailar ka la rakhe ïa ka Graduation Day, ban pynkup burom ïa ki samla pule kiba la pyndep ïa ka jingpule na ka Arts, Science bad Commerce Streams.
Ïa ka prokram la pynlong ha Auditorium Hall jong ka College ha ka jingdonlang u Deputy Commissioner Abhinav Kumar Singh, IAS kum u kongsan, u Ma BN Lamare, Rtd.
Principal nalor kiwei kiwei bad ïa ka jingïalang la sdang da ka jingpynmeh ïa ka sharak.
Haba ai jingkren u Abhinav Kumar Singh, IAS u la ai khublei ïa ki samla pule kiba la pyndep ïa ka jingpule ba kila poi sha u mawjam ba kongsan ha ka jingim jong ki. U la pynpaw ïa ka jingdonkam jong ka jingtrei shitom, ka jingminot bad ka jingkyrshan jong ki nonghikai bad ki longïing.
Haba pynkynmaw ïa ka pateng jong u Kiang Nangbah, u la pynshlur ïa ki samla pule ba kin bat ïa ki jinglong jong ka jingshlur, ka jinglong ba janai bad ka jingshakri katkum ka kyntien imsngi jong ka kolej ‘Awake, Arise and Reach for the Goal”.
U la ban jur ba ka jingnang jingstad kam dei ban long tang na ka bynta ka jingjop shimet hynrei dei ban pyndonkam na ka bynta ka jingbha kaba kham khraw jong ka imlang sahlang.
U Deputy Commissioner u la ai khublei ruh ïa ka jingnoh synniang jong u Principal, ki nonghikai, ki nongtrei, ki kmie ki kpa bad ki nongpeit nongsumar, bad ka Alumni Association ha kaba pynwan dur ïa ki samla pule.
U la pynpaw ka jingsngew skhem ba ki samla pule kin rah shakhmat ïa ka pateng jong ka jaka pule bad ban noh synñiang kaba don jingmut sha ka roi ka par jong ka district bad ka jylla.
Shwa kane u principal Ma Hercules Toi, u la ïathuh ïa ka histori bad ka jingkiew jong ka kolej, kynthup ïa ka jingwanrah ïa ka Commerce Stream, ka jingpyntreikam ïa ka NEP 2020 bad ka jingwanrah ïa ki jingpule bapher bapher.
U la kren ruh shaphang ka jingpyrshang jong ka kolej ban bteng ban ailad ïa ki samla pule ban kyntiew ïa ka jinglah ban ïoh kam bad ban pynkhreh ïa ki na ka bynta ki lad treikam bapher bapher.
La sam syrnod ruh sha ki samla pule kiba la pyndep ïa ka jingpule, bad ki samla pule kiba ïoh ïa ka Grade O, Grade A+, bad Grade A.
