Shillong, Nailar 23
Ka Synjuk ki nongñiah Taxi Sor bad Khapsor ki la pynpaw ka jingkmen lada ki kali Assam bad Meghalaya yn pynhiar ïa ki nongleit nongwan tang haduh Jarobat namar khnang ba kin ïoh kit ïa ki nongjngohkai pyrthei kiba wan sha Meghalaya.
Kane ka jingpynpaw ka Synjuk ka dei hadien ba ki la leit ai jingkyrshan ïa ki nongñiah kali Tourist kiba ïakhih ha Jorabat ban pyrshah ïa ka jingshah khang lynti ki kali Meghalaya ban leit sha Assam.
Hashwa ban hiar sha Jorabat ka Synjuk ka la pynlong ka jingïalang kaba lyngkot ha ISBT Mawlai Mawiong ha ka por mynstep ban jied thymmai ïa u General Secretary kaba ki la pynkhamti ha u Bah Pynsuk youroy.
Ka jingleit ai jingkyrshan ka synjuk ïa ki nongñiah kali kiba na Meghalaya kiba ïakhih ha Jorabat namar ki don ki kynhun nongñiah kali na Assam kiba la pynlong jingïakhih ban khang ïa ki kali Meghalaya ban rung sha Assam.
Haba ai jingkren haba la poi ha Jorabat, u Bah Pynsuk Youroy, General Secretary u la ong kumba ki nongñiah kali na Assam ki la khang lynti ha Jorabat ki pynpaw ka jingkmen namar ba baroh ar tylli ki Jylla kin pynhiar ïa ki nongleit nongwan tang ha Jorabat ne ha Byrnihat khnang ba kin ïoh ban kamai ban kit ïa ki nongjngohkai pyrthei kiba wan sha Meghalaya.
U la ong kane ka jingangnud jong ka Synjuk ka la long kaba la slem ba ïa ki nongjngohkai pyrthei yn kit da ki kali na Meghalaya bad kane ka jingleh ki nongñiah kali na Assam kan sa urlong lada ngin pynkit briew tang ha Jorabat.
Shuh shuh u la pynpaw ka jingpynrem ïa ka Sorkar Meghalaya ka bym lah ban shimkhia ba sa mih ka jingjia shah pynjulor ki kali na Assam bad kali Sorkar ha ka jingïaid rally ka KSU da ki thuk thuk ha ka 19 tarik mynta u bnai.
U Bah Pynsuk u la pynpaw ruh ba ki nongïalam ka KSU ki la dep pynshai ba ki don ki riew shimkabu kiba pynthohbria namar ka seng ka la pynlong ïa kane ka jingïaid rally da kaba jaijai.
U la kynnoh ba ka jingpynmih ïa katei ka huri hura ka long tang ban klet noh ïa ki mat jingdawa jong ka KSU.
Ha kajuh ka por ka Synjuk ka kyrshan ïa ki mat jong ka KSU namar donkam ban wanrah ïa ka eksam DSC bad MPSC ba kin long kiba khuid khnang ban suk ha ka thungkam thungjam ïa ki pateng ban wan.
