Shillong, Nailar 23
U Deputy Commissioner (DC) ka East Khasi Hills District u Abhilash Baranwal u la pyntip ba ka bor district kan nym ai jingbit ïa ka Khasi Students’ Union (KSU) ba kan pynlong ïa ka jingshong kyllain myngngor lashai ka sngi ka 24 tarik mynta u bnai hakhmat u Mot Woh Kiang Nangbah kaba don ha pyrshah ka Civil Hospital Shillong ba ka dang don ka Dorbar Synrai bad na ka jingmih ka jingjia ha ka 19 tarik mynta u bnai.
Haba ïakren bad ki nongthoh khubor hadien ba la wai ka jingïalang hapdeng ka Sorkar bad ki nongñiah kali kamai ha Secretariat kaba long ha ka sngi U Blei, u Abhilash u la ong kumba ka bor district ka la
kyntait ïa ka jingpan jingbit ka KSU ban shong kyllain myngngor ha ka 21 tarik mynta u bnai ha Khyndailad, ka la kyntait ruh ban ai jingbit ïa ka jingthmu ban shong kyllain myngngor lashai ka sngi ka 24 tarik Nailar khnang ban wanrah ïa ka jingshongsuk shongshngain ïa ki paidbah hapoh ka nongbah Shillong.
Kane ka jingshong kyllain mynngor ka KSU ka long ban pynsngew sha ka Sorkar ïa ki san tylli ki mat kiba ka seng ka la dep pynpaw ha kine ki sngi.
U la ïathuh ba ka bor district ka la pynkhlain ki bor pahara ha Shillong khnang ban shngain ka leit ka wan ki paidbah.
“Nga la ïoh ka khubor na kylleng ka ri India ba kam shngain haba wan sha Shillong hynrei nga kyntu ïa ki paidbah khamtam ki nongjngohkai ba ka Shillong ka long ka jaka kaba shngain namar wat shim tang ïa kawei ka jingjia hynrei dei ban shim ïa ka jingshngain ha baroh kawei ka district ruh,” u la ong.
Kumban shu pynkynmaw ba kane ka jinghuri hura ka mih na ka jingshah pynjulor ïa ki kali na Assam ha ka por ba ki riew shimkabu ki la pynjot haba ka Khasi Student’s Union ka la pynlong ïa ka bike rally ha ka 19 tarik mynta u bnai.
