Shillong, Nailar 23
Ki Synjuk nongñiah kali Tourist ka Jylla ki la shim ïa ka rai ban pynsangeh shipor ïa ka jingpakhang ïa ki kali Tourist kiba na Assam, da kaba ai por ïa ka Sorkar Jylla ban pynbeit ïa ki jingeh jong ki nongniah kali kamai hapoh ka 10 tarik u Nailur 2026.
Ïa kane ka rai ka All Khasi Meghalaya Tourist Association (AKMTTA) ka la shim hadien ka jingïalang ba la khot kyrkieh da ka Sorkar Jylla kaba la long ha ka sngi u Blei ha Secretariat ïa kaba la pyniaid ïa ka jingïalang da u Symbud Myntri Rangbah u Bah Sniawbhalang Dhar ha ka jingïadon lang ki heh Sorkar ba kynthup u Deputy Commissioner, Superintendent of Police ka East Khasi Hills District bad kiwei.
Haba kren sha ki nongthoh khubor hadien ka jingïalang u Bah Ricaldinus Dohling President ka AKMTTA u la ïathuh ba ka jingshim rai ban pynsangeh shuwa shipor ban pakhang ïa ki kali Tourist ba na Assam ka dei halor ka jingpan por jong ka Sorkar ban pynbeit hapoh ka 10 tarik u Nailur ïa kine ki jingdawa jong ka synjuk ki nongniah kali Tourist ka Jylla.
“Ngi shim ïa ka lynti ban ap ïa kata ka por ba ka Sorkar ka la kular, ymdei ba ngi la randien ïa ka jingangnud jong ngi, kane ka dei beit ka jingailad jong ngi ïa ka Sorkar ba kan shong pyrkhat ba la kan ai ne ym ai ïa ka jingangnud jong ngi, kaba ngi kwah ban pynkut ïa ka jingkamai tang ha Jorabat” la ong u Bah Ricaldinus.
Haba jubab ïa ki jingkylli, u Bah Ricaldinus u la ong ba lada ka Sorkar kam lah ban ïa pynbeit ïa kine ki jingangnud ba ka synjuk ka la dawa la bun snem mynta, hadien jong ka por ba la buh, ka synjuk kan sa shim ïa ki sienjam ban bteng pakhang bad ban pynphai beit ïa ki kali Tourist ba na ka Jylla Assam kumba la leh ha kine ki ar lai sngi ba la dep.
