Nongstoiñ, Nailar 24
Uwei u briew u la shah rai pynrem da kaba un hap shong phatok haduh 20 snem ha ryngkat ka kuna kaba san phew hajar halor ka jingdonkti ka jong u ban leh beijot ïa kawei ka khynnah kaba dang 17 snem ka rta.
U Superintendent of Police (SP) ka West Khasi Hills District ha ka kyrwoh khubor u pyntip ba ha ka 2 tarik Naitung, 2024, la ïoh pdiang ïa ka ejahar (FIR) na ka nongujor kaba la kynnoh ba ka khun kynthei jong ka, kaba 17 snem ka rta, ka la shah leh be-ijot ha uwei u briew ïa uba la tip kyrteng u Romius Mawsor.
Shuh shuh ka kyrwoh khubor ka ong ruh ba hadien katei ka jingjia la register ïa ka case pyrshah ïa utei u briew ba shah kynnoh katkum ka Shallang PS Case No. 10(7)2024 U/S 4/8 jong ka POCSO Act, bad la pynlong ïa ka jingtohkit da ka WPSI NE Wanniang.
Ka khubor na u SP ka ong ruh ba hadien ba la pyndep ïa ka jingtohkit, ka Investigating Officer ka la buh ïa ka Charge-Sheet pyrshah ïa u briew ba shah kynnoh hapoh Section 5(k)/6 jong ka POCSO Act.
U Superintendent of Police u la pyntip ruh ba ha ka 19 tarik Nailar, 2026, ka ïingbishar jong ka Special Judge (POCSO) Nongstoiñ, hadien ba ka la bishar ïa ki sakhi kiba la lum bad pyni ha ka por jong ka jingtohkit bad jingbishar, ka la pynrem ïa u Romius Mawsor halor ka jingpalat pyrshah ïa ka Section 6 jong ka POCSO Act.
Nangta, u SP u la ong ruh ba ka ïingbishar ka la hukum ba u Romius Mawsor un shah set along haduh Arphew snem (20) ha ka jingshah set along kaba kham jur (Rigorous Imprisonment) bad ka kuna kaba T.50,000/- (Sanphew Hajar).
Ka khubor na u SP ka ong ruh ba ka ïingbishar kala rai ruh ba lada um lah ban siew ïa ka kuna, un hap ban shah set along biang sa shi snem shuh shuh, katkum ka kyndon Section 5(k)/6 jong ka POCSO Act, na ka bynta ka jingpyndep ïa ka kam shah thombor ïa ka longrynïeng jong ka lanot.
