Shillong, Nailar 24
U Myntri Rangbah ka Jylla Conrad K Sangma ha ka sngi Nyngkong, u la ïathuh ba ka Sorkar kala thoh shithi sha ka Khasi Students’ Union (KSU) ba khot ïa ki ban wan sha ka miej ïakren halor ki 5 tylli ki mat jingdawa jong ka.
“Ngi la thoh shithi sha ka KSU bad kyntu ïa ki ba kin wan sha ka jingïakren. Ngi khmih lynti ba ngin sa ïoh ïa ka jubab lehse mynta ka janmiet ne lashai ka sngi bad ngin sa ïakren ïa baroh san tylli ki mat jingdawa jong ka,” ong u Conrad haba ïakren bad ki nongthoh khubor.
Halor ka jingkynnoh ba ka Sorkar ka khlem leh eiei halor ki jingdawa ka KSU, u Conrad u la ong, “Ai ba ngan kular ha phi ba kane kam long kumta bad ha kiba bun ki bynta, ha ka jingshisha, ki kam kila ïaid. Kala don ka jingpynsngewthuh bakla bad kat kiba don ki mat kiba mih, ngin sa pynshai ha ka jingïalang ba ngin sa ïashong bad ka KSU”.
“Kumta, kat kaba donkam ki jingpynshai ngin sa ai ha ki hynrei na ka liang jong ngi, kumba nga ong, ha jan baroh ki bynta, la ka dei kane ka seng lane kiwei ki seng kiba la wan shakhmat, ka Sorkar kala shimkhia bha ban leh eiei ïa kiba bun ki jingdawa jong ki bad ngi la kren shai ruh ïa kiei kiba lah ban leh bad ki bym lah ban leh. Kat kaba ngi lah ban leh, ngi ai ïa ka jingkular bad ngi pynïaid shakhmat ïa ka kam. Kala don ka jingbym biang ha ka jingaiktien. Ngin pynthikna ba ngin don ïa ka jingïalang bad ngin sa pynshai ïa baroh kito ki mat,” u la bynrap.
Haba kylli la ka KSU kan pdiang ïa ka jingkyrpad ka Sorkar, u Conrad u la ong, “Ka shithi lehse kala leit mynta hynrei ngin sa tip kham hadien ha ka por janmiet lane mynmiet”.
Halor ka jingdawa ban pynlait ïa ki nongïalam ka KSU bad ban weng ïa ka MMPO/MPDA pyrshah ïa ki, u Myntri Rangbah u la ong ba ka aiñ kan ïaid la ka jong ka lynti.
“Ka ain ka don halor ka nongrim bad kaei kaba jia, ka ain kan shim la ka jong ka lynti bad kumta kam bha ïa nga lane ïano ïano ruh ban shu wan bad ong ba ki rule bad ki ain kin kylla tang namar ka dei kawei ka Sengbhalang lane kawei pat lane ki riew shimet. Nga sngew ba kane kam ïahap ha ka synshar khadar. Kumta, sngewbha shah ïa ka ain ba kan shim la ka jong ka lynti bad nga sngew ba kam bha ïa ngi ban tuklar,” u la ong.
Haba kyntait ïa ka jingpulom ki bor syntiat ban tehlakam ïa ka bike rally, u Conrad u la ong, “Kam don satia ka jingpulom. Lada kren hok, ki bor khmih kila khmih lut ïa kiei-kiei baroh, ngi treikam ruh da ka jingpyrkhat ha ka nongrim ka jingshaniah bad ka jingkular bad ngi jam shakhmat bad kane ka jingshaniah bad jingkular”.
