Shillong, Nailar 24
U Myntri Rangbah Conrad K Sangma ha ka sngi Nyngkong u la ban jur ba ka Sorkar kan leh tyngeh pyrshah ïa kito kiba pyrshang ban pynrung ïa ka jingtieng jingsmiej hapdeng ki paid nongshong shnong, kata haba shim ïa ki jingjia kam thombor ba 19 tarik Nailar kum ka jingjia kaba sngewsih.
“Kaei kaba la jia ka long kaba sngewsih. Ki don ki briew kiba pyrshang ban pynrung ïa ka jingtieng jingsmiej ha ka imlang sahlang bad ngin ym map satia ïa ki. Ngin sa leh da kaba tyngeh ïa kito kiba pyrshang ban pyntieng ïa u paidbah. Ki nongshong shnong jong ngi kim dei ban khuslai,” ong u Conrad.
U Myntri Rangbah u la kubur ba ki paidbah kila mad ïa ki jingeh hadien katei ka jingjia namar ka jingpynphai kylliang na ka Jylla ba marjan.
“Ki paidbah kila mad ïa katto katne ki jingeh, ngi mynjur ïa kane namar ka jingleh markylliang kaba ngi ïoh na ka Jylla ba marjan. Ïa kane hap ban tehlakam, ïakren bad ïapynbeit. Mynta ba ngi la dep leh ïa kine kiei-kiei baroh, ngi dei ban jam ha ka lynti kaba tei,” u la ong. Haba khot ïa ka jingshim lang ïa ka jingkitkhlieh, u Conrad u la ong ba ka hok ban ïakhih ba jai jai kam dei ïa kaban pyndonkam bakla ha ka ban shim ïa ka aiñ ha la ka jong ka kti.
“Ym tang ka Sorkar hynrei ngi baroh, kynthup ki seng bapher-bapher, ki dei ban ïoh jinghikai bad pynthikna ba kin shim ïa ki sienjam ha ki sngi ban wan khnang ba watla ngi ïoh ïa ka hok ban ïakhih jai jai, kam mut pat ba phin shim ïa ka aiñ ha la ka jong ka kti. Khamtam ban shoh bad buh jingma ïa kiba lui lui-ka khubor ka dei ban leit sha baroh na ngi halor kane ka bynta,” u la ong.
Haba pynpaw ba ka Sorkar jong u ka long kaba kloi ban ïakren, u Myntri Rangbah u la maham ba ïa u lain ym dei ban tam.
“Ngi dei kawei na ka Sorkar kaba pdiang ïa baroh. Ngi la plie ïa ka jingkhang ban ïakren ïa kino-kino ki mat. Hynrei u don u lain ba ngi hap ban buh bad ym don mano-mano ruh ba lah ban tam. Kane ka dei ka khubor ïa baroh, sngewbha wat pyrshang ban leh ïa kata, bad lada don kiba leh, ngin hap ban leh eiei katkum ka aiñ,” u la ong.
