Shillong, Nailar 24
Ki pulit ka Mawngap Police Station ha ka 23 tarik u Nailar 2026, ki la ïoh ka jingtip ba ki paidbah nongshong shong ki la ïoh ban kem ïa kiba la suba nongtuh ha 11 Mer, Mylliem.
Ka ophis u Superintendent of Police (SP), East Khasi Hills, ka la pyntip ba u ophisar uba dei peit ha ryngkat ki pulit ka Mawngap PS, mar ïa ïoh jingtip halor kane ki la leit mar-mar sha katei ka jaka bad lap ba u paidbah u la shoh ïa kitei ki suba nongtuh, ïa kiba la tip kyrteng u Banshan Kurbah (25 snem), uba shong ba sah ha Mairang, Lumkyllang, u Albert Marbaniang (26 snem), uba shong ba sah ha Mawlai Mawtawar bad ka Ibalabet Kharmawlong (27 snem), kaba shong ba sah ha Mawlai Mawtawar.
Shuh shuh la pyntip, ba ki pulit ki la ïaleh ban pyllait ïa kine ki lai ngut na u paidbah, hynrei katba dang pyllait, u wei na ki paidbah u la ktah kti ïa ki ophisar bad ki pulit, ha ryngkat ka jingpyndonkam da ka ktien sih ïa ki bad bteng ban shoh pat ïa ki suba nongtuh.
Ha katei ka jingshah shoh u wei na ki suba nongtuh u la mynsaw jur bad la pynkit noh ïa u sha Pomlum PHC ban ai ka jingsumar bad hadien kata la wallam sha Mawngap PS. Katba ïa ka kali Maruti kaba don ïa u Registration Number ML 05-T-9837 kaba la pyndonkam da kiba suba nongtuh, la tan bad buh ha Thanad.
U SP u la pyntip ruh ba ïa baroh lai ngut kiba la shah suba, la pyllait noh namar ym don kano-kano ka jingujor pyrshah ïa ki na kiwei pat ki liang.
Ha kaba ïadei bad kane ka jingjia bad jingpynmynsaw ïa kine ki lai ngut, la pynngat katkum ka kyndon aiñ hapoh Mawngap P.S. bad ka jingtohkit ka dangïaid shakhmat.
Shuh shuh la pyntip ba ha ka jingtohkit, ka tnad pulit ka la kem noh ïa u Arningson Kharkongor, 37 snem bad ïa u Pynshaiborlang Kharkongor (33 snem), kiba shong ba sah ha Mylliem Kyndong, 11 Mer bad la rah ïa ki ha khmat ka Ïingbishar bad ka jingtohkit ka dang ïaid.
Na ka liang ka tnad pulit, ka la kyntu kyllum sha ki paidbah da kaba maham ba ym dei ban shim ïa ka aiñ ha kti lade hynrei dei ban ujor sha ki pulit da kaba phone ha u number 112 lane ban leit sha ka Police Station kaba jan tam ha kum kine ki jingjia.
