Shillong, Nailar 24
Ha ka nohphai sngi jong ka sngi U Blei, la saphriang ki durkhih ha ki rynsan social media, kaba la pyni ba shah bom bad shah shoh dusmon ïa ki shynrang ar ngut kiba la shah kynnoh ba kidei ki nongtuh, kaba la jia ha Kyndong Nongkyntir Mylliem.
Haba buddien halor kane ka khubor, kitei ki briew kidei shisha kiba la tuh ha kaba ki la leit tuh na ka karkhana ha 12 Mer, hynrei la lap pat ha Kyndong Nongkyntir Mylliem, kaba la ïoh bat da ki paidbah nongshong shnong.
Haba buddien halor kane ka khubor, la ïoh ban ïakren bad u wei u nongtrei katei ka karkhana kaba don ha 12 Mer, ha kaba u la ïathuh ba u nongtuh u la pynpait ïa kawei ka kali kaba ïeng ha karkhana, da kaba tuh ïa ki tiar ki tar kiba don hapoh katei ka kali.
Kane ka jingjia shah tuh, kadei kaba la jia dangstep phyrngap ha ka sngi U Blei.
Haba ïakren bad u Bah Thehborlang Nongrum, u trai ka kali ba shah tuh ha kitei ki briew u la ong, ba ki sah ha katei hi ka karkhana bad ki ïohsngew ka jingshah tuh kadei hadien ba ka kali ka la sawa.
Hadien ba ki la mih na jingkhangïit kim shym la lap shuh ïa u briew ba tuh, hynrei da ka jingpyntip la lap noh ïa kine ki nongtuh ha Kyndong Nongkyntir Mylliem.
U la ïathuh ba hashuwa ban tuh, ki nongtuh ki la khang ïa ka ïing ba ki sah na shabar bad kim lait shuh ban mih hynrei ki la ïoh mih pat na ka jingkhangïit.
“Nyngkong ki la phet rieh noh hadien ba la tip, hynrei ngi la kthong haduh ban da lap ïa kine ki nongtuh. Kine ki nongtuh ki wan da ka kali maruti,” u la ong.
