Shillong, Nailar 24
U MP barim ka Rajya Sabha Dr. W.R Kharlukhi ha ka sngi Nyngkong, u la mih bad weng noh na ka jinglong dkhot jong ka National People’s Party (NPP).
Ha ka shithi iehnohkam ba la phah sha u President ka NPP Meghalaya Bah Prestone Tynsong, u Dr. W.R Kharlukhi u la ong, “Nga buh hangne ïa ka shithi iehnohkam kum u dkhot ka National People’s Party ka ban treikam noh mardor”.
Haba ai khublei ïa ki nongïalam ka seng, u Dr. Kharlukhi u la ong, “Nga ai khublei naduh ka mynsiem ïa ki nongïalam ka seng bad ki para dkhot namar ki kabu, ki jingkyrshan bad ki jingshemphang ba la ai ha nga ha ka jingïatreikam bad ka seng. Nga sngewnguh ïa ka por ba nga pynlut ban ïatrei kam lang ha ryngkat ka seng bad ki dkhot”.
U la kyrpad ïa u President ban pdiang ïa ka jingiehnohkam jong u bad ban shim ïa ki sienjam ban weng noh ïa ka kyrteng jong u na ka thup ki dkhot jong ka seng mardor.
U Dr. Kharlukhi u dei u President barim ka NPP Meghalaya.
