Shillong, Nailar 24
Ka Hynñiewtrep Youths’ Council (HYC) hapoh ka jingïalam u Bah Enlang Sawian, Education Secretary, ha ka 24 tarik u Nailar 2026, ka la leit ban pan da ka Right to Information (RTI), na ophis u Deputy Commissioner, East Khasi Hills District, ban pan jingshai halor ka jingbym pat leh ei-ei ka Sorkar, ban kyndang noh ïa kiba sah beaiñ ha Lum Survey.
Kane kadei ka mat ba ka HYC, ka la dep ban dawa ka slem bha na ka Sorkar, ba kadei ban kyndang noh ïa kiba sah beaiñ ha Lum Survey.
Haba kren sha ki lad pathai khubor u Bah Enlang Sawian u la pynsngew, ba naduh nyngkong hi ka seng, ka shim ïa kane ka mat, ha kaba u President ka seng ruh u la phah da ka jingthoh sha u Lat ka Jylla, hynrei haduh mynta, ka seng kam pat ïoh ka jubab kaba shai.
Kumta u la ong ba ka seng ka la buh ka jing kylli ha ka RTI, ba hato ka la don ne-em ka hukum ban sah ïa kitei ki briew ha katei ka jaka, ki bym lah ban ithuh la kidei ne em ki nongshong shnong ba pura jong ka ri India.
“Haduh mynta ka HYC, kam shym la ïoh ka jubab kaba shai haba ïadei bad ka mat ha Lum Survey, kaba ka seng ka la shim naduh ki snem ba la dep. Kumta nga la hap ban buh da ka RTI ha ophis u DC ban buh ka jingkylli, halor katei ka mat kaba la slem bha,” la ong u Bah Enlang.
Kumta nga buh khnang da kane ka RTI, ba ki paidbah ka Jylla bad ka seng ruh kin tip shai, bad ngin ïoh ruh ka jingshai, ba kaei ba na ka liang ka Sorkar ka la shim haba ïadei bad kiba sah ha Lum Survey.
