Shillong, Nailar 24
Ka Khasi Students’ Union (KSU) ka la shim da ka sienjam ban sam da ki kot lyngkdop sha ki riew paidbah ba kynthup ïa ki nongleit nongwan, ki khynnah pule kumjuh sha ki nongshong ïew ha Ïewduh ban pynsngewthuh paidbah haba ïadei ki san tylli ki mat jingdawa ba la buh hakhmat ka Sorkar.
Ha ki durkhih ba la phah sha ki lad pathai khubor, ki riew paidbah ki la pynpaw ka jingkyrshan ïa ki mat jingdawa ba ka KSU ka la dawa ïa ka Sorkar ba ka dei ban pynurlong, “Ba ki leh na ka bynta ka jaidbynriew ngi hap ban kyrshan” la ong ki riew paidbah.
Shuh-shuh ki paidbah ki la pynrem jur ïa ka Sorkar Jylla haba ïadei ka rukom leit kem ka Sorkar ïa ki lai ngut ki nongïalam jong ka KSU hadien ka jingïaid rally rah lama ïong ba la pynlong ha nongbah Shillong ha ka 19 tarik u Nailar 2026.
Nalor kata ki paidbah ki la pynpaw ba lada ka Sorkar ka lah ban pynurlong ïa ki san tylli ki mat jingdawa jong ka KSU kan long ka jingmyntoi ïa ki paidbah ba bun ba lang, namar kata ki la kyntu ïa ka Sorkar Jylla ba kan pyrkhat bad ban sngap ïa ki jingdawa jong ka KSU kumjuh jong ki paidbah.
