Shillong, Nailar 25
U Myntri Rangbah ka Jylla Conrad K Sangma ha ka sngi Ba-ar u la pyntip ba la dep ban weng ïa ka jingkhang tih dewïong ha Jylla bad ka ïingbishar Supreme Court kala ai jingbit ban tih par katkum ka aiñ, bad ong ruh ba u Myntri ka Coal Ministry u la bthah ïa ki ophisar jong u ban wad ïa ka lynti treikam kiba la don lypa kiba lah ban leh na ka bynta ka Meghalaya.
Haba jubab ïa ka jingïatai kaba lyngkot (short-duration discussion) bala wanrah da u MLA ka VPP na Nongkrem Bah Ardent Miller Basaiawmoit, u Conrad u la ong, “Nga kmen ban pyntip sha phi ba ïa ka jingkhang tih dewïong la dep ban weng noh. Lada don ki bym pat tip, ïa ka jingkhang tih par la dep ban weng. Kaei kaba ka Supreme Court ka ong ka long ba phi hap ban tih katkum ka aiñ”.
U la ong ba ka jingpynkynriah sha ka jingtih par katkum ka jingstad saian ka long kaba jyrwit jyrwat bha ha Meghalaya namar ka rukom long ka riti bat khyndew bad ka jingstang ki syrtap dewïong kaba buh ïa ka rukom tih ‘open-cast’ ban nym ïahap satia.
“Ka Coal Ministry kala khmih ïa ka Meghalaya ha kawei pat ka rukom bad ka hap ban thaw ïa ka aiñ ban pynbiang tarajur ïa ka jingshngaiñ bad ka ïoh ka kot,” u la ong.
Ha ka jingïakynduh ba dang shen ïa u Myntri ba khmih ïa ka tnad Coal ka Sorkar Pdeng ha Delhi ryngkat lang bad ka MLA na Sutnga-Saipung, “U Myntri ha ka jingïalang u la kren shai bad pynpaw ba un sa wad ïa ka lynti. U la pyntip ïa ki ophisar ba ki par bad ki trai khyndew ha Meghalaya ka ïapher bad kumta ka jingtyrwa kam lah ban dei da kajuh. Nga la kyrpad ïa ka lynti ban pynbeit da ka por bad u Myntri u la ai ka jingbthah”.
U ong ba ka Jylla ka kyrmen ba ka jingbuh kyndon ba 100-hectare ba duna eh ka jaka yn sa pynduna bun shah sha u pud ba lah ban pyntrei na ka bynta ki nongtih par trai jylla, ryngkat ki buit treikam bad ki lad jingïada ban ïada ïa ki nongtih par bad ïa ka mariang.
U Conrad u la ong ba u la batai bniah ruh ïa u Additional Secretary ka Coal Ministry ba balei ka Meghalaya ka donkam ïa ka jingïarap ba kyrpang.
U Myntri Rangbah u la ong ba ka Sorkar ka mynjur bad u nongwanrah ïa ka mat ïatai bad sngewthuh ïa ka jingeh jong ki nongtih par tynrai kiba duna ka jingnang jingtip bad shem jingeh ban pyntreikam ïa ki technology ba thymmai hadien ba ka NGT kala khang kynsan ïa ka jingtih dewïong.
Haba kdew ïa ki jingeh ban pyntreikam, u la ong ba tang ha East Jaiñtia Hills ki don haduh 22,000 tylli ki par dewïong.
“Kat kane ka jingbun ki par, phim lah ban pyrkhat. Ka dei ka jingïaksaid ki ophisar ban pynthikna ba ki kam ki ïaid katkum ka aiñ,” u la ong.
U la ïathuh ba ka jingtih par beaiñ kala lam sha ka jingkhang ïa ki par bad ktah ïa ka kamai jakpoh, hynrei ka Sorkar ka dang trei ïa ki kam ban pynthikna ba ka jingtih par katkum ka aiñ kan ïai bteng bad ba ki kam beaiñ kin sangeh noh.
