Shillong, Nailar 25
U Chief Electoral Officer (CEO) ka Jylla, u Dr. B.D.R. Tiwari ha ka Sngi Ba-ar u la khmih bniah ïa ka jingïaid shakhmat jong ka Special Intensive Revi-sion (SIR) 2026 bad ong ba na ki 6,43,439 tylli ki notis ba la pynmih, 4,78,217 tylli la dep ban pynpoi bad 1,65,222 tylli ki dang sahteng.
Haba pynïaid ïa ka jingïalang ‘Online’ bad ki DC, DEO, ERO bad AERO ha ka 25 tarik u Nailar, u Tiwari u la bthah ïa ki heh ophisar ban pynsted ïa ka jingtreikam bad ban ai ka por kaba biang sha ki nongthep ‘vote’ ban leit sha ki ‘Hearing’ lem bad ki kot ki slab a donkam. La bthah ruh ïa ki distrik kiba bun kiba sahkut ban buddien na ki jaka thep ‘vote’ ha kyrdan ki BLO.
U la ong ruh ba la pynlong 62,343 tylli ki ‘Hearing’ haduh mynta – 9.69% na kito kiba la pynithuh – ba ban jur ba yn ym pyndam ïa kano-kano ka kyrteng na ka ‘Draft Roll’ khlem ka jingpyntip, ka jingtohkit bad ka ‘Hearing’.
Ka jingïalang ka la kdew ba ïa ki ‘Hearing’ ha ki 14 tylli ki konstitwensi jong ka East Khasi Hills la pynsangeh noh haduh ban da pynmih hukum da kumwei pat namar ka jinglong-jingman ka shongsuk shong shngaiñ, lait noh ka 26-Shella, 27-Pynursla bad 28-Sohra. Ïa ki tarik bathymmai yn sa pyntip.
Katkum ka jingkheiñ, ki don 6,51,644 tylli ki ‘case’ kiba donkam ban pynshisha – 2,22,786 tylli hapoh ka ‘No Mapping’ bad 4,28,858 tylli kiba don ka jingbym ïahap ha ka ‘Mapping’ kum ka kyrteng lane ka kyrteng jong ki kmie ki kpa ka bym ïahap bad ka SIR jong u snem 2005, ka jingbym ïahap ka rta hapdeng ki kmie ki kpa, kiba shipara bad ki mei-ieid-pa-ieid.
Baroh la ïoh pdiang haduh 5,848 tylli ki jingkam bad jingpyrshah hadien ba la pynmih ïa ka ‘Draft Roll’, kynthup ïa 2,840 tylli ki jingpynrung, 2,250 tylli ki jingpynbeit, 503 tylli ki jingpynkylla bad 255 tylli ki jingpyrshah ban pyndam noh.
Halor ka jingpynbeit ïa ki jingeh, la shim jingkheiñ ïa 2,729 tylli ki ‘Call’ lyngba ka ‘Book a Call with BLO’, ha kaba la dep ban jubab ïa 2,502 tylli.
Na ka liang u Tiwari u la ban biang ba ki nongthep ‘vote’ (kiba dei hok) kiba la jah kyrteng na ka ‘Draft Roll’ ki dang lah ban aplai lyngba ka ‘Form 6’ haduh ka 4 tarik u Nailur. Ïa ka ‘Final Roll’ yn sa pynmih ha ka 7 tarik u Risaw.
