Shillong, Nailar 25
U Myntri ba khmih ïa ka kam jngohkai pyrthei ka Sorkar Jylla u Timothy D.Shira u la ong ba ka jingpakhang surok ha kine ki sngi ba la dep, kaba la jia naduh ka 19 tarik u Nailar 2026, ka la ktah bha ïa ka kam jngoikai pyrthei bad ïa ka ïoh ka kot jong ki trai hotel bad ki ïingbasa.
“Ka don ka jinghiar haduh kata-kata ïa ka jingwan jong ki nongwan jngohkai pyrthei, bad kane baroh kadei na ka daw ba ka don ka jingpakhang surok,” la ong u Myntri haba kren sha ki lad pathai khubor ha ka sngi Ba-ar jong ka taïew.
“Kam don ka jingwan ki nong jngohkai pyrthei. Kumno kin wan haba ïa ki surok la khang lynti,” la ong u Myntri.
U la ong ruh ba halor kane ka kam, ki ar ngut ki Myntri Rangbah ka Jylla, ki la ïa kren ban ïa pynbeit,.
U la ban jur ba kum kine ki jingjia, kim dei ban jia shuh ha ka jylla kum ka jing pakhang lynti, namar ka ktah ïa ka leit ka wan jong ki kali jong ki ar tylli ki jylla.
U Myntri u la ong ba ki kali kiba don ïa u register jong ka Assam bad ki kali dei ban shah ban wan sha ka jylla Meghalaya kumjuh ruh ki kali na Meghalaya dei ban shah ïa ki ban rung sha Assam.
“Halor ka jingshah pynjulor ki kali na Assam, ka Sorkar ka la mynjur ban siew ka bai lutksan, bad nga kyrmen ba kum kine ki jingjia, kin ym jia shuh hapdeng kine ki ar tylli ki jylla,” la bynrap u Myntri.
Haba ïadei bad ka jingshah ktah ki hotel bad ki ïingbasa u Myntri u la ong, “Ka Sorkar kan ym siew bai lut ksan na ka daw jong ka jinghiar ka ïoh kot”.
U la kyntu ïa ka shong suk shongsaiñ na ka bynta ka jingïaid beit ïaid ryntih jong ki kali kamai, u Myntri u la kyntu ïa ki paidbah jong ka Jylla Meghalaya, ban long kiba husiar bad ban peit ïoh kan wan kyrtoh shalade na ki kam kiba ki leh, ha ka jingïadei bad ka Jylla Assam.
