Shillong, Nailar 25
U Myntri Rangbah ka Jylla Conrad K Sangma u la pynphai nia ïa ki dkhot ka Liang Pyrshah ka Voice of the People Party (VPP) halor ka mat ïada ïa ka khyndew ka shyiap, da kaba kyrpad ïa ka seng kaba ïalam ïa ka KHADC ba ka dei ban kynthuplang ïa ki Dorbar Shnong ha ki aiñ khyndew.
Haba jubab ïa ka jingïatai ba lyngkot (short duration discussion) ba la wanrah da u President ka VPP Bah Ardent Miller Basaiaw-moit, MLA ka Nong-krem, u Conrad u la ong ba ka Sorkar jong u kam ju ïaid lait ïa ki rukom treikam.
U Conrad u la mynjur ïa ka jingong u Bah Ardent ba ka jingïamir jingmut bad ki paidbah ka long kaba donkam bha na ka bynta kano kano ka rai kaba ïadei bad ka khyndew ka shyiap, hynrei u la ong ba ïa kajuh ka nongrim la pynkheiñ da ka KHADC.
Haba pynpaw ïa ka aiñ jong ka KHADC Regulation and Registration of Land (Amendment) Bill, 2026, ban pynrung kyrteng ïa ka khyndew ka shyiap, 2026, u Conrad u la ong ba kane ka aiñ ka wad ban weng noh ïa kawei ka kyndon kaba kongsan bha na ka bynta ban ïamir jingmut bad ki khlieh nongsynshar.
“Ka don ka kyndon ha ka Section 16 jong ka aiñ kaba don la don lypa yn weng noh ïa ki kyntien ‘hadien ba la ïasyllok shwa bad ki Dorbar Shnong, ki Dorbar Raid, bad ki Dorbar Hima’ kiba paw hadien ka kyntien ‘Executive Committee’,” u la ong.
U Conrad u la pynpaw ka jingsngewsih namar kane ka la ïaid pyrshah pura ïa ka nongrim ba la kdew ha kane ka jingïakren mynta ka sngi. Ha kawei ka liang u la ong ba dei ban shimkhia ïa ka imlang sahlang, katba ha KHADC ïa kane ka aiñ kyrpang la pynkylla ban weng noh ïa ka Dorbar Shnong, weng noh ïa ka Raid bad kumjuh ruh ka Dorbar Hima.
Hashwa ba u Conrad un ai jubab, u Bah Ardent u la wanrah ïa ka jingïatai ïa ki shiphew tylli ki mat jingdawa jong ka VPP ha ha ïingdorbar thawaiñ ka jylla kaba la long ha ka sngi Ba-ar.
Ki mat kiba kongsan kiba u Bah Ardent u la dawa ki long ba dei ban pyndam noh ïa ka Lumpongdeng project, ban wanrah ïa ka jingthungkam kaba khuid ha Meghalaya Public Service Commission bad District Selection Committee, ban sdang biang ban tih dewïong katkum ka aiñ, ban ïada na ka jingrung kyrthep ki briew nabar ka jylla, ban wanrah ka jingpynbeit thymmai ïa ka jingtih maw bad mawshun ban ïada ïa ka mariang, ban sangeh noh ban thungkam ïa kiba ophisar kiba la shongthait bad kiwei.
