Shillong, Nailar 25
Ki nongniah trok katba ki dangpynlong ka jingïakhih kaba jai-jai halor ki mat jingdawa, ka la mih pynban ka thma ktien hapdeng ki nongniah trok bad u Nidamon Chullet, uba la wan ha ka jingïakhih.
Ki jingdawa jong ki draibar trok kiba dei ki trai jylla kiba niah ïa ki kali kompeni transporter bad kumjuh jong ki kharkhana dewbilat, ki kynthup ban pynbeit noh ïa ka kynrum-kynram kumba la pynsngew kham hashuwa bad kumjuh ban khmih ïa ka bha ka miat jong ki nongniah kali, kaba ki kompeni dewbilat ki la leh shiliang, haduh ba kim don jingsngew shuh ha ka ïap ka im.
Ha ka por ba ki nongniah trok ki dang pynlong ka jingïakhih, la wan mih u Nidamon Chullet bad ki briew ka kompeni dewbilat, ban pynsangeh ïa ka jingïakhih jong ki, kaba la mih ka thma ktien kaba jur bha.
Hapdeng ka jingïatai ñia kaba jur bha, ki nongniah trok ki la buh jingkylli, kaei ba don jingïadei jong u ne u briew bad ki briew ka kompeni, ha kaba u Nidamon Chullet u la kubur ba don ka jingïadei kum shipara katba ki bar jylla pat ki la kylla ktien, ba kidei tang shi kynhun.
Shuh shuh, na ka liang kine ki nongniah kali, ki la dawa na u Nidamon Chullet ba u dei ban mih na katei ka jaka bad ban nym wan mushlia ïa ka hok ki nongniah trok, namar ki khlem pynthut ïa u.
Ka la mih ruh ka jingkynnoh, ba u Nidamon u dei ruh u heh nongïalam ka NPP Jaiñtia Hills, uba shu wan ban pynthut bad mihkhmat ha man ba don ki jingïakhih jong ki nongniah trok ha Jaiñtia, naduh mynshuwa ka por ba ïakhih ki nongniah trok na ka kynhun Meghalaya Commercial Truck Owners and Drivers Association (MCTODA).
