Shillong, Nailar 25
Ka Khasi Student’s Union (KSU) Sengkmie ka la rai ban leit ïakynduh ïa u Myntri Rangbah ka Jylla u Conrad K Sangma, lashai ka sngi ka 26 tarik mynta u bnai ha ka por 6:00 baje janmiet ha Conference Hall, Secretariat.
Katkum ka shithi ba la phah ha ka 25 tarik mynta u bnai, ka Sorkar Jylla lyngba ka tnad Kam Pohïing kaba la soi da ka Kong DD Syngai, MCS, Joint Secretary ka Sorkar Jylla ka la phah sha u samla Pynshaibor-lang Rani, Assistant General Secretary ka KSU Sengkmie halor ka phang ban khot ïakren halor ki mat ba ka seng ka dawa.
Katkum katei ka phang ba la kdew ka Kong DD Syngai MCS ka la pyntip sha u Samla Pynshai ba u Myntri Rangbah ka Jylla u Conrad K Sangma un pynlong ïa ka jingïalang bad ka KSU ha conference hall, Secretariat, ha ka 26 tarik mynta u bnai ha ka por 6 baje janmiet halor ki mat ki jura ba ka KSU ka la buh.
Kumta ka la kyrpad ïa ka seng ba kin wan ha kane ka jingïalang.
Na ka liang ka KSU ruh kaba la shong jingïalang ha ka sngi Ba-ar ka la rai ban leit sha kane ka jingïalang lashai ka sngi ban ïakren ïa ki san tylli ki mat ba ka la buh hakhmat u Myntri Rangbah ka Jylla.
Kumban shu pynkynmaw ka KSU ka la pynlong ïa ka jingïalang ha man ki district ha kine ki sngi bad ha ka 19 tarik pat ka la pynlong da ka jingïaid paidbah da ki thuk thuk bad ha kane ka por ki don ki riew shim kabu kiba la pynjulor ïa ki kali Assam bad kali Sorkar haduh ba ka la pynbitar sa ïa ki nongñiah kali na Assam ban khang lynti ïa ki kali na Meghalaya ban leit sha Assam.
Ha katei hi ka miet ki pulit ki la leit ban kem noh ïa ki nongïalam ka KSU kata ïa u President samla Raymond Kharjana, samla Rueben Najiar uba dei u General Secretary bad u samla Pynkmenlang Sanmiet uba dei u Vice President.
Hadien kine ki jingshah kem ki lai ngut ki nongïalam ba mynta ka KSU, ki nongïalam barim ba kynthup ïa u Bah Samuel Jyrwa, Bah Lambokstarwell Marngar, samla Donald Thabah ki la mih shakhmat ban ïakyrshanlang ban ai jingmut ïa ki dkhot ka Central Executive Committee ban shim ïa ki rai haba ïadei bad kine ki san tylli ki mat.
Kine ki san tylli ki mat ba ka KSU ka dawa hakhmat ka Sorkar ka long ban pyndam noh ïa ka jingpynsngew paidbah jong ka Shree Cement, ban pyntreikam noh ïa ka Meghalaya Residents Safety and Security Act 2016, ban pynbeit thymmai ïa ka rukom thungkam, kynthup ban pynduh noh ïa ki personal interview na ka bynta ki kyrdan Grade B, C, bad D katkum ki jingbthah ka Sorkar Pdeng bad pynbha ïa ka rukom treikam ka MPSC lem bad ki DSC, ban pynurlong ïa ki ain kiba dei hok halor ki nongtrei na shabar ri (amended Migrant Workmen Act) khnang ban da ïa ki lad ïoh kam ïoh jam ki trai shnong, ban pynbeit ïa ka rukom thung nongtrei ha NEIGRIHMS, 80 la 20 jong ki kynthei bad shynrang ha ka kam nos bad ban ïoh bhah da ki trai jylla.
