Shillong, Nailar 25
Ka Jylla Meghalaya ka la dep ban register haduh 1,878 tylli ki case kam tuh naduh u snem 2025, ha kaba ka East Khasi Hills ka la long kaba bun tam eh, pyntip u Symbud Myntri Rangbah ba khmih ïa ka tnad Kam Pohïing Bah Prestone Tynsong hapoh ïingdorbar ha ka sngi Ba-ar.
Ha ka jubab da ka jingthoh ïa ka jingkylli jong ka MLA ka TMC ka Miani D Shira, u Bah Prestone u la ong, haduh 1095 tylli ki case kam tuh la register ha u 2025 bad 783 tylli haduh u Naitung, 2026.
Haba phai pat sha ki District, ka East Khasi Hills ka la sakhi haduh 610 tylli ki case ha u 2025 bad 460 tylli haduh Naitung, 2026.
La bud pat sa da ka West Jaiñtia Hills kata 84 bad 58 tylli ki case, West Garo Hills 81 bad 83 tylli, bad ka Ri-Bhoi 78 bad 57 tylli ki jingkheiñ kiba dei ha kine ki snem ba la batai.
Ki district kiba duna eh ki long ka South West Khasi Hills bad ka South Garo Hills.
Halor ka jingkem pat, u Bah Prestone u la ong ba ki pulit ki la kem ïa ki briew kiba donkti ha ki 495 tylli ki case.
Ha u snem 2025, haduh 332 tylli ki case la lah ban pyndep, katba ha u 2026 (haduh Naitung), 163 tylli ki case la lah ban pyndep.
Hangne ruh ka East Khasi Hills ka la lam khmat ha ka jingïoh kem, ha kaba haduh 189 tylli ki case la pyndep ha u 2025 bad 119 tylli ha u 2026, bud pat da ka West Garo Hills da 61 tylli bad 20 tylli ki case.
Ha Ri-Bhoi, tang kawei napdeng ki 57 tylli ki case ba la register ha u 2026 la lah ban pyndep, katba ha Eastern West Khasi Hills bad West Khasi Hills, ym pat lah ban pyndep ïa kawei ruh ka case haduh u bnai Naitung mynta u snem, la ong ka jubab.
