Shillong, Nailar 25
U President ka Trinamol Congress (TMC) uba dei u MLA ka Nongthymmai Constituency Bah Charles Pyngrope u la pyntip ba ka TMC ka la rai ban nym pynïeng kyrtong ban ïakhun ha ka ilekshon MP Lok Sabha shiteng samoi na Shillong Parliamentary namar ba kam don ïa ka dur khmat kaba biang.
U MLA ka Nongthymmai u la ïathuh ba kiwei ki seng saiñpyrthei, kynthup ïa ka Congress, ki la pan jingkyrshan na ka TMC.
“Hooid, baroh ki la kner ïa ka kti ban pan jingkyrshan, ka NPP ruh ka lah ban kner, ki don ka hok kumta ka jingkylli ka shong ha ngi ha kano ka liang ngin shim,” u la ong.
Haba kylli hato ka TMC ka la rai ban kyrshan paidbah ïa kano kano ka seng, u Bah Charles u la ong, “Kumba ka long mynta, em.”
“La ngin dang long hapdeng ne em, ngin sa peit, ngin hap ban shim ïa ka jingkhot halor kata,” u la bynrap.
U Bah Charles u la ong ruh ba ka seng ka dang lah ban projek ïalade lada ki briew ki kwah ïa ka lad kaba lah ban treikam.
“Lada shim ba ki briew kin kwah ïa ka lad kaba lah ban treikam, ngi lah ban mih dalade man ka por bad ynda phi la tes ïa ka um, phin sa tip sha kano ka lynti ka leit,” u la pynpaw.
