Shillong, Nailar 25
U Myntri ka tnad Arts & Culture Bah Sanbor Shullai ha ka sngi Ba-ar u la pynbna ban sa shna bha biang ïa u motdur jong u Subhas Chandra Bose bad Swami Vivekananda kiba la shah pynjulor ha RR Colony ha ka ‘bike rally’ ka KSU.
U Bah Sanbor u la ong ba ka tnad kan sa shna pynbha ïa kine ki artylli ki mot haba burom ïa ka synniang kaba khraw jong ki ha ka jingtei ïa ka Ri.
Haba pynrem ïa ka jingjia, u la ong ba ki jingïakhih ki dei ban long kiba jai jai bad ki kam thombor ki don ïa ka jingktah kaba neh slem ïa ka jingkiew shaphrang ka Jylla.
“Ngi kum ka imlang sahlang kaba la shai ngi dei ban pynthikna ba kino kino ki jingïakhih ki dei ban long kiba jai jai namar ka jingktah na kino kino ki jingpynjulor ba mih na ki kam thombor ki dei kiba ktah jur ïa ka jingkiew bad ka roi ka par jong ka Jylla,” u la ong.
Haba pynpaw ïa ka jingsngewkhia halor ka jingpynjulor, u la kyntu ïa ki samla bad ki samla pule ba kin shim ïa ka jinghikai na ki jinghikai jong kine ki arngut ki riewkhraw ka Ri.
