Shillong, Nailar 26
Ka Khasi Students’ Union (KSU) ka la buh por ar bnai ïa ka Sorkar Jylla ba kan pynlong ïa ka Umling Facilitation Centre kaba treikam kumjuh ban pyntreikam ïa ka Migrant Workers Act kaba la pynkhlaiñ, haba pdiang ïa ka rai ban pynsangeh ïa ki kam jong ka Shree Cement.
Haba kren hadien ba wan ka jingïalang bad u Myntri Rangbah Conrad K Sangma ban ïakren haba ïadei ki san tylli ki mat jingdawa ka KSU u Bah Lambokstar Marngar President barim ka KSU u la ong ba la dawa ban pyndam noh ïa ka Public Hearing jong ka Shree Cement Ltd kumjuh ban sospon ïa u Deputy Commissioner bad ïa u SP.
U la ïathuh ba ka Sorkar ka la mynjur ban thaw ïa ka Independent Enquiry Committee ba la lam khmat da u briew ba laitluid, khlem u DC bad SP lem bad ki kynhun kiba don bynta. “Ngi dawa ban pynsangeh pura. Ka Sorkar ka la pyntip ba tad haduh ban da pyndep ka Committee ïa ka kaiphod, baroh ki kam jong ka Shree Cement kin sangeh lut. Ngi ngeit ba kan bat ïa la ka kular, hynrei lada ka pynïaid shakhmat, ngi ruh ngin leh ïa kaei kaba donkam” ong u Bah Lambok.
Halor ka MRSSA 2016 bad ka khyrdop talasi mynder, u Bah Lambok u la ong ba ka KSU ka tip ba ka Amendment 2020 ka la leit na u Lat ka Jylla sha ka Sorkar Pdeng ban pan jingshai bad ka ïingkashari ka la dep kyntait ïa ka jingmudui pyrshah ïa ka Act 2016.
U pyntip ba 18 tylli ki Entry Point la dep ban ithuh ha u snem 2016, hynrei ym pat don kawei ruh kaba treikam. Watla ïa ka Umling la plie ha u 2019, katba ka la kylla long pynban ka Covid Checking Centre bad hadien kum ka Food Court. “U Myntri Rangbah u la kubur bad kular ban pynlong ïa ka jingïajurip lang ha Umling bad pyntip ba ka kam kan sa sdang noh mardor. Hapoh ka ar bnai, ka dei ban lah pynlong ïa ka kaba treikam” ong u Bah Lambok.
Na ka bynta ka Ratacherra ha East Jaintia Hills, u la ong ba ki trai jaka ki la kyntait ban ai ïa ka jaka rep kwai bad Myntri Rangbah u la kular ban sa wad jaka biang hapoh ka 3- 4 bnai.
Haba ïadei ka Meghalaya Identification, Registration, Safety and Security of Migrant Workers Act 2020, u Bah Lambok u la ong ba ka KSU ka la pynsngew ba ka dei kaba tlot bad kyntu ïa ka Sorkar ban wanrah ïa ki kyndon kiba ïa syriem kum ka Work Permit. “Ngi ai jingmut ba ïa ka jingpynshisha ki Pulit bad ki kyndon daiñ kuna dei ban pynrung khnang ban pynkhlaiñ ïa ka. Ka kynhun Myntri ka la ai jingmynjur mynta bad ka Sorkar ka la pyntip ba hapoh 15 sngi yn sa pyntreikam pura ïa ka” ula ong.
Halor ka NEIGRIHMS, u Bah Lambok u la ong ba u Myntri Rangbah u la phah ïa ki jingai jingmut ka KSU sha u Myntri ka Sorkar Pdeng bad kular ban sa pynbeit ïa ka jingïalang ba markhmat ban pynsngew ïa ki jingtreikam bymhok.
Halor ka thungkam MPSC bad DSC, u la ong ba ka Sorkar ka la pynthikna ba lah pynduh ïa ki Interview ha ka thungkam Group-C bad jan kumba 70% na ki 23 tylli ki mat jingpynkylla ba la ai jingmut da ka Reform Committee u snem 2024 ïa ka MPSC la pyntrei mynta.
Halor ka jingdawa ban pynlait ïa ki nongïalam ka KSU, “Ngim shym la dawa ban pynlait ïa ki. Haba don ki jingïakhih, ka jingkem kan don beit. Ngi ïeh ha ka jingstad jong ka Sorkar bad ngin bteng ban ïaleh halor ki ishu”la ong u Bah Lambok.
