Shillong, Nailur 02
U Samla Donald Thabah, General Secretary barim ka Khasi Students’ Union (KSU), u la kynnoh ba dei ka Sorkar hi ba ka kwah ban pynshong beit ïa ki nongïalam ha along.
Haba kren sha ki lad pathai khubor, ha ka janmiet jong ka sngi Balang haba wan synran ïa ki nongïalam kiba la shah rah biang sha ïingkashari, u Samla Donald Thabah u la ong, ba ka seng kam pat ïoh ka jingshai kaba thikna halor ka jingthep mukotduma ka Sorkar, hynrei ka la long ka jingkhñiot beiñ ïa ki nongïalam.
“Ngi shu buh jingkylli, ka Sorkar ka leh shi leh kumne ban pynngat kyndon ïa ki nongïalam, ka pyntyrha ïa ki nongïalam bad ki paidbah ruh kin nym lah shah,” la ong u Samla Donald.
Nalorkata, u la ong ba la don ki katto-katne ki mukotduma ba la ïoh jamin.
“Ngim tip sa katno tylli ka Sorkar ka kwah ban thep mukotduma biang pyrshah ïa ki nongïalam. Ka Sorkar ka kwah beit ban set along ïa ki nongïalam,” u la bynrap.
U la ong ruh ba ka jingthep mukotduma ka Sorkar shiphang shiphang, ka pynkulmar ym tang ïa ki nongïalam ba la shah kem ne ki dkhot ka seng, hynrei wat ïa ki paidbah ruh kumjuh, namar ka la long kumba ki la khñiot beiñ ïa ki.
