Shillong, Nailur 02
Ki pulit ka East Khasi Hills, ha ka janmiet jong ka 02 tarik u Nailur 2026, ki la rah biang ïa ki nongïalam ka Khasi Students’ Union (KSU), kiba la shah kem, sha ïingkashari District and Session Court, Shillong, ban tian bishar.
Kine kiba la shah kem, ki kynthup ïa u Samla Raymond Kharjana, President, Samla Reuben Najiar, General Secretary bad u Samla Pynkmenlang Sanmit, Vice President, bad u Samla Jeremiah Pohtmi Assistant Organizing Secretary.
Ka jingrah biang ki pulit ïa kine ki nongïa-lam ba la shah kem, ka dei ba ki la shah pynngat mukotduma biang, haba ïadei bad ka mukotduma Rynjah Police Station.
Shuwa ban rah sha ïingkashari District and Session Court, ki pulit ki la rah sha Civil Hospital Shillong ban leh ïa ka Medical Check-up, ïa kitei ki nongïalam ka KSU.
Lah ban kdew, ba ka jingkem ki pulit ïa ki nongïalam ka KSU, kadei hadien ba la jia huri hura ha ka rally ar shaka, myn ha ka 19 tarik u Nailar 2026, kaba la pynlong da ka KSU, ha kaba la jia ka jingshah pynpait ki kali Sorkar, ka jingshah thang ki kali Sorkar, bad kiwei-kiwei de ki jingjia.
Haba pyrshang ban ïakren bad u Samla Raymond Kharjana, President, u la ong “Ka Sorkar kan pynngat 10-20 tylli ki mukotduma ruh ngim sngewpher shuh, hynrei ki mat ba dawa ka KSU, kidei ban urlong noh.”
U la pynpaw ba ka jingrah biang ki pulit sha ïingkashari ban tian bishar, kadei tang ka jingtynjuh ïa ki nongïalam ka KSU.
“Lada phi pynngat 10 ne 20 tylli ki mukotduma ruh ngim sngewpher shuh, hynrei kaba kongsan ka long ba ki mat kiba ngi la dep kren bad ka Sorkar, kidei ban urlong noh ym dei ban pynslem shuh,” u la bynrap.
