Shillong, Nailur 02
Ka Sorkar Jylla kala rai ban pynsangeh treikam ïa u Advocate General, Amit Kumar haduh artaïew katba ka dang ïakren bad ki nongïasaid aiñ kiba la dawa ban weng.
Ka Meghalaya High Court Bar Association bad ka Shillong Bar Association kila pynlong ïa ka jingïakhih da kaba sangeh treikam ne ban nym leit mih sha Ïingkashari halor ka jingdawa ban weng noh ïa u Amit Kumar kum u AG namar ka rukom treikam jong u.
Ïa kane ka kam la ïakren biang ha ka sngi Balang ha ka jingïalang ba la pynïaid da u Symbud Myntri Rang-bah ba khmih ïa ki kam pohïing Bah Prestone Tynsong, ha jingïadon ryngkat u Myntri ba dei peit ïa ka tnad aiñ u Bah Lahkmen Rymbui, kaba la ïashimbynta da baroh artylli ki association.
Haba ïakren bad ki nongthoh khubor hadien ba la wai ka jingïalang u Bah Lahkmen u ïathuh ba baroh artylli ki association ha ka sngi Balang, kila pynsngew ïa bun ki jingeh jong ki, kynthup ka jingpyrshah ïa u AG.
“Ki juh ki jingdawa jong ki, ki pyrshah ïa ka rukom treikam jong u Advocate General, ha kaba kila kwah ban weng noh ïa u” ong u Bah Lahkmen.
Ula ong ba ka jingthung ïa u AG ka dei ka kam ba leh katkum ka riti synshar, ka dei kaba hap ban rai da ka Kynhun Myntri, hynrei kum ka sienjam ba shipor, ka Sorkar kala kyrpad ïa u AG ban nym leit mih sha Ïingkashari.
“Ngi la kyrpad ïa u AG ba ha kine ki artaïew ban wan ba un nym leit sha ïingkashari ban ïakhun mukotduma, hapoh ka shitaïew ngin sa ïakynduh biang haba ïadei bad baroh ki mat jingdawa jong ki” ula ong.
Ula kyntu ïa ki Bar Association ba kin ïatreilang bad weng noh ïa ki jingïakhih kat bym pat long ka jingïa kren, haba pynpaw ba ka Sorkar ka donkam ïa ka por ban bishar ïa kiei-kiei baroh.
Haba ïakren bad u Secretary ka Shillong Bar Assosiation u Bah T.L Jyrwa, u la ong ba na ka liang ka Sorkar kan sa shimkhia ha kaba ïadei bad ka mat jingdawa kaba ki muktiar ki ïakynduh jingeh.
Kane ka jingpynpaw ka dei hadien ba la wai ka jingïalang bad u Symbud Myntri Rangbah ka Jylla u Bah Prestone Tynsong bad u Myntri ba dei peit ïa ka tnad Law u Bah Lahkmen Rymbui, ki ophisar Sorkar bad ki muktiar, kaba la long mynta ka sngi Balang ha Secretariat.
Haba kren sha ki lad pathai khubor, u Secretary u la ong ba ka Sorkar ka la pynpaw ïa ka jingsngewkhia bad ka la pan por ïa ka JEC ar taïew ban ailad ïa ka Sorkar ban pyrkhat da kaba kdew ruh ba ha kine ki ar taïew, ka Sorkar ka la rai ban pynsangeh treikam shipor ïa u Amit Kumar kum u Advocate General ha ryngkat ki kynhun kiba u la thung khlem da ïaid ki kyndon katkum ki jingdonkam.
Kumjuh ruh u la ban jur ba hapoh ka shi taïew kan don ka jingïakynduh biang bad ka Sorkar.
Haba kylli la kane ka jingïakhih sangeh treikam jong ki muktiar kan dang bteng ne em, u Bah T.L Jyrwa u la ong ba na ka liang ki nongmihkhmat ki Association bapher-bapher ki la rai naduh lashai ka 3 tarik u Nailur, baroh ki muktiar kin sdang ban leit trei biang sha la ki kam.
