Shillong, Nailur 02
Ka Sorkar Jylla ha ka Sngi Balang ka la ong ba ka pisa baibam hapoh ka skhim ‘Umbrella Post-Matric’ na ka bynta ki samla pule ST jong u snem 2025-26 ka la poi kham kloi sha ki samla pule ban ïa kaei kaba la pynbna, ha kaba la dep ban pyllait T.91.01 klur sha ki 87,691 ngut ki nongïoh jingmyntoi hapoh lai-saw sngi jong ki sngi treikam.
Haba pyllait ïa ka pisa ha Shillong College ha ka 27 tarik Nailar, u Myntri Rangbah ka Jylla, u Conrad K. Sangma u la ong ba kan shim por san haduh hynriew sngi ba ka pisa kan paw, la kdew ka Sorkar ha ka kyrwoh, da kaba bynrap ba ïa ka jingpyllait pisa la pyndep hashuwa ka por ba la buh lyngba ka lynti jong ka ‘SNA-SPARSH’ kaba pynpoi beit ïa ka pisa na ka RBI sha ka ‘Account’ ki samla pule.
Ka la ong ba la siew pura sha baroh ki nongaplai ba la pynshisha kiba u ‘Aadhaar’ jong ki u ïadei thik bad ka ‘Bank Account’ kaba treikam bad ba ym shym la iehnoh ïa kino-kino ki samla pule.
Na ki 96,812 tylli ki aplikeshon ba la pynshisha mynta u snem – 61,194 tylli kiba dang thymmai bad 35,618 tylli kiba la pynthymmai – 87,691 tylli la dep ban siew.
Kiba 9,121 ngut kiba dang sah kim pat shym la ïoh namarba ka jingbym pynïasoh ïa u ‘Aadhaar’ lane ki jingtip ba bakla jong ka ‘Account’ bad ïa ka pisa, la buh kyrpang na ka bynta jong ki, ong ka kyrwoh.
“La bthah ïa ki samla pule ki bym pat ïoh ïa ka pisa ban leit mih sha ki jaka kynshew pisa jong ki bad ban pynïasoh ïa u ‘Aadhaar’ bad ka ‘Bank Account’ jong ki. Shisien ba la dep ïa kane, yn sa ïaid shakhmat bad ka jingsiew ha ka kylla kaba bud,” la ong ka Sorkar.
Ka jingdonkam baroh na ka bynta u snem 2025-26 ka long T.198.43 klur. Haba nujor ïa kane, la pynbiang T.84.55 klur ka bhah ka Sorkar Pdeng bad T. 9.40 klur ka bhah jong ka Jylla – baroh, T.93.95 klur la dep ban pynbiang haduh mynta, ha kaba T.91.01 klur la pyllait bad T.2.94 klur tylli ka dang don ha ka jingpynkhreh.
Ka pisa kaba sah, kaba long T.104.48 klur, yn sa pyllait ha ki ‘Instalment’ ban wan ha ki 5 bynta kiba mar katjuh sha baroh ki samla pule kiba dei hok, ha ka jaka jong ka rukom kaba mynshuwa ha kaba tang kumba 20% ki ïoh pdiang ïa ka jingsiew kaba pura ha ka kylla kaba nyngkong, la ong ka kyrwoh.
Haba batai ïa ka ‘Credit Lag’, ka la ong ba ki jingsiew ki ïaid lyngba ka jingpynkhreh ïa ka thup jong ki nongïoh jingmyntoi da ka Directorate of Higher and Technical Education, ka jingmynjur jong ka tnad pla tyngka, ka jingpyllait ïa ka pisa Sorkar Pdeng bad Sorkar Jylla, ka jingpyntreikam jong ka RBI bad ka ‘Final Credit’ da ki jaka kynshew pisa ki samla pule, ha kaba ka por ka ïapher katkum ki jaka kynshew pisa. Haba peit katkum ki distrik, ka East Khasi Hills ka la ïoh pdiang 25,525 tylli ki aplikeshon kiba la pynshisha, West Jaiñtia Hills – 12,552, West Garo Hills – 10,601 bad Ri-Bhoi – 9,388, nalor kiwei.
Ïa ki jingaplai na ka bynta u snem 2026-27 ha ka ‘National Scholarship Portal’ la plie naduh ka 3 tarik u Naitung haduh ka 30 tarik u Naiwieng, 2026 bad la bthah ïa ki samla pule ba kin pyntikna ïa ka jingpynïasoh ‘Aadhaar’ ha ka por ba ki aplai.
Na ka bynta ka jingïarap, ki samla pule ki lah ban ‘phone’ ha u nombor – 7005037347 lane 9615000269, lane email [email protected].
