Nongstoiñ, Nailur 02
Ka Voice of the People Party (VPP) Rambrai Jyrngam kala pynpaw ba kan nym aili ba ïa ka hok ki samla pule, samla wad kam ba yn shah knieh jubor hano re hano ki bym dei ban ïoh.
U Bah Robert Wahlang, Organising Secretary ka VPP Rambrai Jyrngam haba kren bad ki nongthoh khubor u la ong, ha kaba ïadei bad ka mat hapoh ka District Institute of Education and Training (DIET) Nongstoiñ, West Khasi Hills ba ki don ki rukom pynrung ïa ka bhah jong ki khynnah pule, ha kaba kam shym la ïahap bad ka bhah na ka bynta ki Block kiba hap hapoh ka West Khasi Hills District.
U Bah Robert u la ong, katkum ka jingpynbna la phiah ïa ka bhah ki khynnah ha ki ‘Block Wise’ ha kaba mynta ki don san tylli ki block hapoh ka West Khasi Hills kumta lai ngut kiba dei ban ïoh rung, hynrei kumba ka long bad ïoh ïa ka jingpyntip na ki nongïakhun (candidate) ki ban ïashim bynta ban shah hikai ha ka institute, ki la pyntip ba kala don ka jingpynrung bakla ha kaba ki bym dei na Rambrai Block la pynrung ha ka jaka jong ki ba dei na Rambrai Block.
Shuh shuh u la ong ba ka VPP hadien ka jingwad jingtip ka la lap ba ar ngut ki candidate kim dei na Rambrai, bad ha kaba ka la leit ban ïakynduh ïa ka Principal ka DIET kaba la pynshai ba la pynmih ïa ka thup (list) lyngba ka syrnod ba la ai ka ophis u Block Development Officer Rambrai.
Halor kane, ka VPP kala leit ïakynduh ïa u BDO ka Block bad u la kubur ba kala don ka jingbakla ha kaba ïadei bad ka jingpynmih ïa ka jingpynbna.
U Bah Robert u la ong ba ka VPP ka pynpaw ïa ka jinglyngngoh kaba jur ba watla lap ba don ka jingbakla hynrei ki khlem pynbeit hynrei ki la shu ieh kumto.
“Ka VPP ka kren da kaba shai ba dei beit ban pynbeit namar kane kam dei ka bynta bad ka hok ka jong ki bad ngim don kano-kano ka jingpyrshah ïano-ïano hynrei kam dei ka hok jong kitei ki samla arngut bala pynrung,” ong u Bah Robert.
U la ïathuh ba wat hadien ka jingïakren bad u BDO hynrei kam shym la don kano-kano ka jingpynbeit lane ka jingphah jingtip sha ka institute bad kane ka la pynlong ïa ka VPP ban leit biang sha u BDO, hynrei u la aidaw ba ha ka jingbun kam um lah ban leh bad hadien ka jingïakren u la ong ba un sa phah noh ïa ka shithi mar mar sha ka institute ban phah weng noh ïa ki ar tylli ki syrnod ki bym dei na Rambrai Block.
U la ong ba ka VPP ka phah ka khubor kaba shai sha ka institute bad kumjuh sha ka ophis u BDO kaba pynmih ïa kitei ki syrnod ba ki dei ban pynbeit kloi ïa kane ka kam khnang ba ki khynnah pule napoh Rambrai kin ïoh ban leit ban sdang noh ïa ka klas jong ki kaba ki dei hok ban ïoh.
