Shillong, Nailur 02
Haba kyntait ïa ki khubor leit pynïasoh BJP ki nongmihkhmat ka TMC, u Nongïalam ka Liang Pyrshah, u Dr. Mukul Sangma ha ka Sngi Balang u la ong ba ka seng jong u ka long kaba skhem ha ka Liang Pyrshah bad ba kum kine ki khubor ki pyni ïa ka jingbym shai hapoh ka Kynhun Synrop kaba bat ïa u lakam synshar.
“Haba phai sha ki dkhot jong ka TMC, nga dei ban ong da ka jingsngewskhem ba ngi ïai tehsong kawei ha ka jingkitkhlieh jong ngi kum ki dkhot ka Liang Pyrshah bad ngin ïai bteng ban trei katkum kata,” la ong u Mukul.
U la ong ba ki seng kin pyrshang ban pynïar ïalade, hynrei ka jingpynkylla ïa ki rai ilekshon jong u paidbah, ka pynsniew ïa ka synshar paidbah.
“Man la ki seng saiñ pyrthei kin pyrshang ban pynïar ïa la ka seng, hynrei ban pynkylla ïa ki rai ilekshon u paidbah ka dei ka jinglong-jingman kaba ma bad kam manbha na ka bynta ka synshar paidbah,” u la ong, da kaba ai nuksa ïa ka Arunachal Pradesh, Maharashtra, West Bengal bad Delhi, kynthup ïa uwei u MP ka AAP uba dang dang shu pynïasoh sha ka BJP.
“Kine ki dei kiei-kiei kiba pynpaw ïa ka jinglong bathymmai haba ïadei bad ka jingshah khwai ha ka saiñ pyrthei, kaba lah ban don pat ka jingktah ha ka ban pyntlot bad ban pyndonkam bakla ïa ka bor halor ka rai u paidbah,” u la ong.
La hato kine kiei-kiei baroh ki buh jingma ïa ka Sorkar ba la ïalam da ka NPP, u la ong, “Ngim lah ban kyntait eiei, hynrei kumba ka long mynta, ngam tharai ba ka don ka jingma ïa ka bor synshar kaba mynta. I-kumba ka dei namar ka jingbym don ka jingïatylli ha ka Kynhun Synrop kaba mynta.”
“Ka long shisha ka mat kaba sngewkhia, hynrei ngam kwah ban kren eiei halor kata namarba ka dei ka mat poh-ïing jong ki seng kiba ïadon bynta,” u la ong, da kaba bynrap, “ka pynpaw ïa ka jingbym don ka jingïatylli ha ka Kynhun Synrop kaba mynta.”
Halor ka jingkner jong ka BJP sha ka TMC, u Mukul u la ong, “Nga tharai ba kata ka jingpyrshang ka la don mynshuwa, hynrei ki tip ruh ïa ka nongrim jong nga bad ka nongrim jong ngi; ban burom ïa ka nongrim jong iwei-pa-iwei, ka nongrim ha ka saiñ pyrthei, ka buit saiñ pyrthei, nga tharai ba ka long kaba kongsan bha ha ka synshar paidbah.”
Haba batai ïa ka jinglong-jingman ka saiñ pyrthei ha ka ri kum “kaba pher haduh katta-katta”, u Mukul u la ong ba ka jingshah khwai jong ki MP ka don ïa ki jingktah kiba kham heh ban ïa ki MLA namarba ka Parliament ka don ïa ka bor ban pynkylla ïa ka Riti-Synshar ka Ri bad kum kine ki sienjam ki ktah ïa ka rai jong ka Ri baroh kawei.
“Haba ka jia ha ka kyrdan jong ka ri kaba kynthup ïa ki dkhot ba la jied jong ka Ïingdorbar Parliament, ka jingmih kaba kut na kum kane ka sienjam saiñ pyrthei ka long ka bym pat ju jia mynno-mynno bad ka long ruh kaba ma namarba ka ktah ïa ka rai jong ka Ri,” u la ong.
“Ki don ki por ba ki dkhot kiba dei na ki seng saiñ pyrthei ki rai, kynriah bad pynïasoh bad ki seng saiñ pyrthei bapher-bapher hynrei ka dei ban don ka daw, katto-katne ka jingthmu, kaba dei ban peit bniah kyllum na ka jingïohi jong ka jingmyntoi jong ki paidbah bad ka Jylla baroh kawei hynrei lada ka dei na ka bynta ka jingpynbeit ba shipor bad lada ka dei na ka bynta ban don ha ka bor, kata ka pher. Ka don kaei-kaei kaba la ñiew kum ka jinglong pher,” u la bynrap.
