Shillong, Nailar 26
U Myntri Rangbah ka Jylla, u Conrad K. Sangma ha ka Sngi Balang u la ong ba ka Sorkar Jylla ka dang buddien ïa ka mat na ka Sorkar Pdeng na ka bynta ban ïoh jingmynjur ïa ka Meghalaya Residents, Safety and Security (Amendment) Bill, 2020 (MRSSAB) katba ka nang pynkhlaiñ ïa ka jingpyntreikam jong ka MRSSA, 2016 kaba la don lypa.
Haba kren sha ki nongthoh khubor hadien ka jingïalang jong ka Kynhun Myntri, u Sangma u la ong, “Ki jingïakren kiba bun ki dang ïaid shakhmat bad ngi kyrmen skhem ba ngin sa lah ban rah shakhmat ïa ka MRSSA, 2020 bad ban pyntreikam ïa ka. Ngi dang ap namar ki dang don sa katto-katne ki mat kiba hap ban pynbeit.”
U la ong ruh ba la pynlong ïa ki jingialang ha ka kyrdan jong u Myntri kam pohïing ka Sorkar Pdeng, Secretary kam pohïing ka Sorkar Pdeng bad Chief Secretary.
Halor kane ka aiñ kaba mynta, u Sangma u la ong ba ka Sorkar ka dang pynïar ïa ka jingpynrung kyrteng ha kylleng ki thaiñ ha ryngkat ka jingïarap jong ki khlieh nongsynshar shnong.
“Ngi la leh ïa ki jingpynrung kyrteng ha ki jaka bapher-bapher bad ki Rangbah Shnong lem bad ki nongïalam shnong ki la ïadon bynta lang. Kane ka dang ïaid shakhmat mynta,” u la ong.
U Myntri Rangbah u la ong ba ka Sorkar ka dang ïaleh ban wanrah ïa ka tehnoliji jingithuh dur khmat lyngba ka ‘mobile’ ban weng ïa ki jingeh bapher-bapher.
“Kan long kaba suk bha ïa ki Rangbah Shnong ban pyntreikam lada lah ban ïoh bynta ha kano-kano ka ‘mobile’. Lym kumta ka donkam ïa ka ‘Laptop’, ka ‘Camera’, u briew u ban lum thup ïa ki jingtip bad ka kamra. Ngi don 6,500 tylli ki shnong bad ki jaka, kumta ban pynbiang ïa ki jingdonkam ha man la ki jaka ka long ka jingeh kaba khraw,” u la ong.
U la bynrap ba ka jingtrei ka dang ïaid shakhmat ban pyndep bad pyntreikam ïa ki ‘Facilitation Centre’ na ka bynta ki nongjngohkai pyrthei, kaba long shi bynta jong ka aiñ u snem 2016.
